बालुवाटारमा बीआरआई बारे रस्साकस्सी चलिरहेका बेला कसरी निस्कियो मन्त्री फेर्ने कुरा ?

५ मंसिर, काठमाडौं । मंगलबार साँझ प्रधानमन्त्रीको सरकारी निवास बालुवाटारमा सत्ता साझेदार दल नेपाली कांग्रेस र नेकपा एमालेका नेताबीच प्रधानमन्त्री केपी शर्मा ओलीको आसन्न चीन भ्रमण र त्यो भ्रमणमा उठाइने एजेण्डाबारे लामो छलफल चल्यो । चीन विदेशमन्त्री वाङ यीसँग परराष्ट्रमन्त्री डा. आरजु राणाको १५ मंसिर गते भेटवार्ताको मिति तय भएपछि ओलीले बैठक बोलाएका थिए ।  

प्रधानमन्त्री ओलीको चीन भ्रमणअघि बेइजिङ जान लागेकी मन्त्री राणाको त्यहाँ पुगेको भोलिपल्ट चिनियाँ समकक्षी वाङसँग भेटवार्ता हुन लागेको हो । यो मिति तय भएपछि प्रधानमन्त्रीले कांग्रेस सभापति शेरबहादुर देउवासहितका नेताहरूलाई बालुवाटारमा बोलाएको कांग्रेसका एक नेताले नेपालबहसलाई जानकारी दिए । उनका अनुसार खासमा ओलीको चीन भ्रमणका समयले नेपालका तर्फबाट राखिने एजेण्डहरुका विषयमा छलफल सुरु गरेका थिए । यसैमा लामो समयदेखि प्रतीक्षा र विवादमा रहेको चीनको रणनीतिक बेल्ट इन रोड इनिसियटिभ (बीआरआई)बारे बढी छलफल चल्यो ।   

छलफल चरिरहेका समयमा कांग्रेस सभापति देउवासँग ओलीले नै मन्त्रिपरिषदका केही सदस्यमाथि प्रश्न उठेको कुरा उठाए । उनले कांग्रेस र एमालेका एक दुई जना मन्त्री फेर्नुपर्ने आशय देखाएका थिए । मन्त्रिपरिषद् फेरबदल गर्नुपर्ने कुरा ओली आफैंले उठाएपछि कांग्रेस र एमालेका नेताहरू केहीबेर यही विषयको छलफलमा जुटेका थिए । कांग्रेसका ति नेताका अनुसार सुदूरपश्चिमबाट मन्त्री भएकाहरू फेरिन सक्ने सम्भावना छ । मन्त्री फेरिन सक्ने कुरा उठ्यो तर, नाम तोकिएन ।  

बैठकमा दुई दलबीच चीनको रणनीतिक परियोजना बीआरआईबारे मुख्य छलफल भएको थियो । प्रधानमन्त्री ओली मंसिर १७ गते चीनको भ्रमणमा जाँदैछन् । यो बेला बीआरआईकाे कार्यान्वयन सम्झौता गर्ने तयारी छ । त्यसैको तयारीका लागि दुई दलबीच छलफल भयो । बीआरआई कार्यान्वयनमा कांग्रेसका नेताहरूले त्यसको मोडालिटीमा फरक मत राखेका थिए । कांग्रेसले तत्काल देश धेरै ऋणमा परिसकेको भन्दै अनुदानमा मात्र बीआरआई लिनुपर्ने अडान लिएको थियो ।  

एमाले भने सहुलियतपूर्ण ब्याजदरमा भए पनि बीआरआई लिनुपर्ने भनिरहेको छ । जसमा दुई दल सहमत हुन सकेका छैनन् । यही सहमति हुन नसक्दा मंगलबार साँझका लागि तय भएको मन्त्रिपरिषद्को बैठक पनि स्थगित गरिएको थियो । यो बैठकबाट प्रधानमन्त्री ओलीले आफ्नो चीन भ्रमण स्वीकृत गर्ने तयारी गरेका थिए । बैठकमा एमालेबाट प्रधानमन्त्री एवं पार्टी अध्यक्ष केपी शर्मा ओली, अर्थमन्त्री विष्णु पौडेल र प्रधानमन्त्रीका प्रमुख राजनीतिक सल्लाहकार विष्णु रिमाल सहभागी थिए । 

कांग्रेसबाट सभापति शेरबहादुर देउवा, सत्ता संयन्त्रका संयोजक पूर्णबहादुर खड्का, पार्टीका महामन्त्री गगन थापा, परराष्ट्रमन्त्री आरजु राणा देउवा सहभागी थिए । बैठकमा परराष्ट्रमन्त्री राणा जापान हुँदै बेइजिङ जाने कुरा उठेको थियो । उनी ११ मंसिरमा जापान जाने कार्यक्रम छ । स्वास्थ्य परीक्षणका लागि  ३ दिन बिताएर उनी १४ मंसिरमा बेइजिङतर्फ लाग्ने जानकारी बैठकमा गराइएको थियो ।  

प्रधानमन्त्री ओलीले चिनियाँ पक्षले राखेका प्रस्ताव र नेपाली पक्षबाट थपिने योजनाबारे कांग्रेसका नेताहरूसँग अझै छलफल गर्न बाँकी छ । एमालेका एक नेताका अनुसार बीआरआईका सन्दर्भमा सत्ता सहयात्री कांग्रेससँग समझदारी कायम गरेर मात्र अघि बढ्न प्रधानमन्त्री ओलीले चाहेका छन् । चिनियाँ पक्षले बीआरआई कार्यान्वयन योजनासम्बन्धी सम्झौतामा हस्ताक्षर गरेर मात्रै परियोजना अघि बढाउन चाहेको छ, तर कार्यान्वयन योजना सम्झौतामा हस्ताक्षर नगरीकन पनि परियोजना अघि बढाउन सकिने तर्क कांग्रेसको छ । 

ओलीले बैठक बोलाउनुअघि सभापति देउवाले आफ्ना दुई महामन्त्रीसमेत डाकेर छलफल गरेका थिए । ओलीको आसन्न चीन भ्रमण तयारीमा कांग्रेसले बीआरआई अन्तर्गतका ऋण परियोजना सकार्न नहुने अडान राखिरहेको छ । सभापति शेरबहादुर देउवाले बालुवाटार बैठकमा पनि यही चासो राखेका थिए । यिनै विषयमा देउवाले ओलीसँग कुरा गर्न चाहेपछि मंगलबार मन्त्रिपरिषद् बैठक रोकेर दुई शीर्ष नेताबीच छलफल चलेको थियो । जुन मध्यरातसम्म लम्बियो । कांग्रेसले गत असार १७ मा बसेको पार्टीको पदाधिकारी र पूर्व पदाधिकारीहरूको बैठकबाटै बीआरआईलाई सहयोग वा अनुदानका रूपमा मात्र स्वीकार गर्न सकिने निर्णय गरेको विषय पनि बैठकमा उठेको थियो ।