जिसस कैलालीको प्रमुखमा कांग्रेसकी चौधरी निर्वाचित

५ मंसिर, कैलाली । नागरिक उन्मुक्ति पार्टीकी उम्मेदवारले उम्मेदवारी फिर्ता लिएपछि जिल्ला समन्वय समिति कैलालीको प्रमुखमा नेपाली कांग्रेसकी उम्मेदवार टीकाकुमारी चौधरी भुल निर्विरोध निर्वाचित भएकी छिन् । 

निर्वाचन अधिकृत प्रेम भट्टका अनुसार नागरिक उन्मुक्ति पार्टीकी रुपमती डगौरा थारुले उम्मेदवारी फिर्ता लिएपछि चौधरी निर्विरोध भएकी हुन् । समन्वय समिति संयोजक चयन गर्न हुन लागेको उपनिर्वाचनका लागि डगौरा र भुल दुईजनाको उम्मेदवारी परेको थियो । 

नागरिक उन्मुक्ति पार्टीको निर्णयअनुसार बुधबार थारुले उम्मेदवारी फिर्ता लिएपछि फिर्ता लिएपछि कांग्रेस उम्मेदवार भूल निर्विरोध भएकी हुन् । एमालेले भने यसअघि नै कांग्रेस उम्मेदवार भूललाई समर्थन गरेर साझा उम्मेदवार बनाएको थियो । सुदूरपश्चिममा कांग्रेस, एमाले र नागरिक उन्मुक्ति पार्टीको संयुक्त सत्ता गठबन्धन छ ।

नागरिक उन्मक्ति पार्टीकी उम्मेदवारले फिर्ता नलिएको अवस्थामा पनि कांग्रेस एमालेकी साझा उम्मेदवार भूल निर्वाचित हुने निश्चित थियो । २५ जना कुल मतदाता रहेको सुदूरपश्चिममा कांग्रेस एमालेको मत संख्या १३ जना पुग्छ । कांग्रेससँग आठ र एमालेसँग पाँच मत संख्या छ । कैलालीमा जिल्ला समन्वय समिति प्रमुख पदम कलेलको ०७९ साल पुस २३ गते मृत्युभएपछि पद रिक्त थियो ।