कीर्तिपुरको नगरप्रमुख बन्न मनोनयन दर्ता गरेका २० जनामध्ये कसैले पनि फिर्ता लिएनन् उम्मेदवारी

५ मंसिर, काठमाडौं । मंसिर २ गते भएको मनोनयन दर्ताको क्रममा किर्तिपुर नगरपालिकाको मेयर पदका लागि उम्मेदवारी दिएका २० जना कसैले पनि नाम फिर्ता नलिएको निर्वाचन अधिकृतको कार्यालयले जनाएको छ । बुधबार नाम फिर्ता लिनेका लागि समय दिइएको थियो । तर, कसैले पनि नाम फिर्ता लिएनन् । 

तत्कालीन मेयर राजकुमार नकर्मीको गत साउन १० को मध्यरातमा निधन भएपश्चात् त्यहाँ उपनिर्वाचन गर्नुपरेको हो । नेपाली कांग्रेसबाट निर्वाचित भएका नकर्मी लामो समयदेखि मिर्गौला रोगबाट पीडित थिए ।

२०७९ सालमा भएको स्थानीय तह निर्वाचनमा नकर्मीले ९०४३ मत ल्याउँदै चुनाव जितेका थिए । उक्त निर्वाचनमा ५५०७ मतसहित नेकपा एमाले उम्मेदवार केश रत्न बज्राचार्य दोस्रो र ४०९० मतसहित माओवादीका उम्मेदवार शिव शरण महर्जन तेस्रो भएका थिए ।  

अब मंसिर १६ गते हुने स्थानीय तह उपनिर्वाचनमा कीर्तिपुर नगरपालिका प्रमुखमा अब २० जनाको भिडन्त हुने भएको छ । निर्वाचन अधिकृतको कार्यालयले मेयर पदका लागि २० जनाको नामावली प्रकाशन गरेको छ । अन्तिम नामावलीको सूची प्रकाशन गर्दा नगरपालिका प्रमुखमा २० जना उम्मेदवारको नाम सार्वजनिक गरिएको छ ।