सहारा सहकारी ठगीमा संलग्न भएको भन्दै रवि लामिछानेविरुद्ध चितवनमा पनि पर्यो उजुरी

५ मंसिर, चितवन । सहकारी ठगी प्रकरणको अनुसन्धानका क्रममा पक्राउ परी कास्की प्रहरीको हिरासतमा रहेका राष्ट्रिय स्वतन्त्र पाटी (रास्वपा) का सभापति एवं पूर्वगृहमन्त्री रवि लामिछानेविरुद्ध चितवनमा पनि जाहेरी परेको छ । चितवन सहारा सहकारी ठगी प्रकरणमा लामिछानेसहित १० जनाविरुद्ध जाहेरी परेको प्रहरीले जानकारी दिएको छ ।

यसअघि कास्कीमा अनुसन्धान भइरहेका बेला लामिछानेविरुद्ध काठमाडौंबाट पनि पक्राउ पुर्जी जारी भएको थियो । कालीमाटीस्थित स्वर्णलक्ष्मी बहुउद्देश्यीय सहकारीको रकम गोर्खा मिडिया नेटवर्कमा लगि अपचलन गरिएको भन्दै उनी विरुद्ध पक्राउ पुर्जी जारी भएको हो । 

उनीसँगै नेपाल प्रहरीका पूर्वडीआइजी छविराज जोशी, कुमार रम्तेल, गीतेन्द्रबाबु(जिबी) राई, देवेन्द्रबाबु राई, इरान लामा, कविता तामाङ, हेमन्त अधिकारी, रविना रिमाल, भूपेन्द्र राई, नवीन अछामीसहित २२ जनाविरुद्ध पक्राउ पुर्जी जारी भएको थियो । रविलाई पोखराबाट काठमाडौं ल्याउने तयारी भइरहेका बेला चितवनमा पनि उजुरी परेको हो ।