आर्यन खानको वेभ सिरिज नेटफ्लिक्समा आउने

६ मंसिर, काठमाडौँ । बलिवुडका किङ खान शाहरुख खानका छोरा आर्यन खानको आगामी वेब सिरिजको औपचारिक घोषणा भएको छ । शाहरुख आफैंले छोरा आर्यनको नेटफ्लिक्स सिरिज घोषणा गरेका छन् । गौरी खानले निर्माण गरेको यो सिरिज आर्यन खानले निर्देशन गरेका हुन् । नेटफ्लिक्स र रेड चिलीज इन्टरटेनमेन्टले यो सिरिज २०२५ मा रिलिज हुने बताइएको छ । 

शाहरुख खानले सामाजिक सञ्जालमा एक पोस्ट सेयर गर्दै यो जानकारी दिएका हुन् । वास्तवमा आर्यन खान यसै सिरिजबाट निर्देशनमा डेब्यु गर्न लागेका छन् । यो सिरिज फिल्म उद्योगको पृष्ठभूमिमा आधारित रहेको बताइएको छ ।

नेटफ्लिक्सले यो सिरिज र यसको लस एन्जलस आयोजित कार्यक्रममा रेड चिलिजसँगको साझेदारीको घोषणा गरेको छ । यो सिरिज फिल्म उद्योगमा आधारित रहेको र यस सिरिजमा बलिउडको ग्ल्यामरस र अप्ठ्यारो दुनियाँमा आफ्नो पहिचान बनाउन खोज्ने बाहिरी व्यक्तिको संघर्ष पनि देखिने बताइएको छ ।

यसैबीच शाहरुख खानले यस सिरिज बारे पोष्ट गर्दै लेखेका छन्, ‘यो विशेष दिन हो किनभने हामी दर्शकसामु नयाँ कथा ल्याइरहेका छौं । आर्यन आफ्नो नयाँ यात्रा सुरु गर्न लागेकाले रेड चिलीजका लागि यो दिन निकै विशेष छ । उनको नयाँ वेब सिरिज चाँडै नै नेटफ्लिक्समा आउनेछ । अगाडि बढ र मानिसहरूलाई मनोरञ्जन गर । याद रहोस, शो बिजनेस जस्तो कुनै व्यवसाय छैन ।’

नेटफ्लिक्स र रेड चिलीज इन्टरटेनमेन्टले यसअघि पनि सँगै काम गरिसकेका छन्। यो वेब सिरिज नेटफ्लिक्स र रेड चिलीज इन्टरटेनमेन्ट बीचको छैटौं फिल्म हो । यसअघि दुवैले डार्लिङ, भक्त, क्लास अफ ८३, बेताल र बार्ड अफ ब्लडजस्ता फिल्ममा सँगै काम गरेका थिए ।