गुआर्डिओलाले म्यानचेस्टर सिटीमा सम्झौता नवीकरण गर्ने

६ मंसिर, काठमाडौँ । पेप गुआर्डिओलाले म्यानचेस्टर सिटीमा आफ्नो सम्झौता नवीकरण गर्ने भएका छन् । मिडिया रिपोर्टका अनुसार गुआर्डिओला २०२६ को जुनसम्म सिटीमा रहने गरि सम्झौता नवीकरण गर्न सहमत भएका हुन् । सिटीमा उनको सम्झौता आगामी जुनमा सकिदै थियो । नयाँ सहमतिमा उनको सम्झौता २०२७ को जुनसम्म लम्बाउन सकिने उल्लेख रहेको छ ।

गुआर्डिओला २०१६ को जुलाई १ देखि म्यानचेस्टर सिटीको मुख्य प्रशिक्षक रहेका छन् । उनले अहिलेसम्म म्यानचेस्टर सिटीलाई ६ प्रिमियर लिग उपाधि जिताएका छन् । त्यस्तै २०२२–२३ को च्याम्पियन्स लिग पनि जिताएका छन् । उनको नेतृत्वमा सिटीले २०२३ मा फिफा क्लब विश्वकप जितेको थियो भने २ पटक एफए कप, तीन पटक कम्युनिटी शिल्ड, र चार पटक इएफएल कप जितेका छन् ।