नदी किनारको मापदण्डबारे सर्वोच्चको आदेश खारेज गर्न माग गर्दै माइतीघरमा प्रदर्शन

६ मंसिर, काठमाडौं । सर्वोच्च अदालतले काठमाडौंका नदी तथा खोला किनारका मापदण्ड २० मिटर बढाउन दिएको आदेश खारेज गर्न माग गर्दै काठमाडौंमा प्रदर्शन भएको छ । सडक तथा खोला मापदण्ड पीडित संघर्ष समिति तथा भूमि अधिकार संरक्षण संघर्ष समितिको नामबाट प्रदर्शन गरिएको हो । 

२०८० को पुस ३ गते सर्वोच्च अदालतले नदी क्षेत्र संरक्षणका लागि बागमती, विष्णुमती लगायत उपत्यकाका ठूला नदी तथा खोलाहरुमा ४० मिटर जग्गा छाडेर मात्र संरचना निर्माणको अनुमति दिन आदेश दिएको थियो । त्यसअघि २०६५ सालमा मन्त्रिपरिषदले बागमती, विष्णुमती लगायत ठूला नदीहरुमा २० मिटर क्षेत्र छाड्नुपर्ने निर्णय गरेको थियो । 

पहिले २० मिटर छाड्नुपर्ने भनिएकोमा खोलामा थप २० मिटर छाड्न सर्वोच्चले दिएको आदेश कार्यान्वयनका लागि काठमाडौं महानगरपालिकाले सूचना जारी गरेको थियो । यसपछि यसको विरोध हुँदै आएको छ । सरकारलाई पनि यस अदेशको पुनरावलोकनमा जान दवाव बढेको छ । 

बिहीबार ललितपुरको कुपण्डोलस्थित बागमती नदी किनारबाट सुरु भएको ¥याली माइतीघर मण्डलासम्म पुग्ने छ । ¥यालीमा अभियन्ता सुमन सायमी लगायत छन् । जनतालाई उठिबास गर्ने गैर न्यायिक सडक तथा खोला मापदण्ड खारेज गर लगायत नारा लेखिएका ब्यानर र प्लेकार्ड बोकेर प्रदर्शनकारी सडकमा आएका छन् ।