दल बिभाजनविरुद्ध उपेन्द्र यादवले दिएको रिटको पेशी सर्वोच्चको पूर्ण इजलासमा

६ मंसिर, काठमाडौं । जसपा नेपालका अध्यक्ष उपेन्द्र यादवले आफ्नो दल विभाजनविरुद्ध सर्वोच्च अदालतमा दायर गरेको रिटको पेशी तीन न्यायाधीशको पूर्ण इजलासमा तोकिएको छ । यो इजलाशमा न्यायाधीशहरू हरिप्रसाद फुयाँल, टेकप्रसाद ढुंगाना र सुनिलकुमार पोखरेल रहेका छन् । 

यादवको रिट यो इजलाशको ३ नम्बरमा पेसी परेको छ । यादवको मुद्दा संयुक्त इजलासले गम्भीर संवैधानिक व्याख्याको विषय देखिएको भन्दै  २०८१ भदौ १३ गते पूर्ण इजलासमा पठाएको थियो । पूर्णमा पठाएपछि यो विवादमा  सुनुवाइ हुन सकेको छैन । २०८१ जेठ २७ गते  न्यायाधीशद्वय हरिप्रसाद फुयाँल र तिलप्रसाद श्रेष्ठको इजलासले पूर्ण इजलासमा पेस गर्ने आदेश गरेको थियो । 

जसपा नेपाल छाडेका अशोक राईसहितका नेताहरूले निर्वाचन आयोगमा अर्को दल दर्ता गर्न निवेदन दिएपछि आयोगले उनीहरूको दल दर्ता गरिदिएको थियो । तर यादवले आफ्नो दल छाडेका नेताहरूले दिएको निवेदनको आधारमा अर्को दल दर्ता गर्नु गैरकानुनी भएको जिकिर गर्दै सर्वोच्चमा रिट दायर गरेका थिए ।  

यस्तै यादवले दल छाडेर जाने ७ सांसदको कामकारवाहीमा पनि रोक लगाउन माग गर्दै सर्वोच्चमै अर्को रिट पनि दिएका थिए । दुवै रिटलाई सँगै राखेर हेर्ने गरी इजलास तोकिए पनि हेर्न नभ्याइने पर्दै आएको थियो । यसअघि इजलासले यादवको पक्षमा अल्पकालीन अन्तरिम आदेश जारी गरेको थियो ।