भारतीय सेना प्रमुखलाई कालो झण्डा देखाउने तयारी गरेपछि ग्रेटर नेपाल अभियानका फणिन्द्र पक्राउ

६ मंसिर, काठमाडौं । नेपाल प्रहरीले ग्रेटर नेपाल अभियान चलाइरहेका फणिन्द्र नेपाललाई  नियन्त्रणमा लिएको छ । उनलाई काठमाडौंको शान्तिनगरबाट प्रहरीले निमन्त्रणमा लिएको हो । शान्ति सुरक्षा कायम गर्ने सिलसिलामा आवश्यकता देखिएपछि उनलाई पक्राउ गरिएको प्रहरीले जनाएको छ । 

काठमाडौं प्रहरी परिसरका एसपी नवराज अधिकारीका अनुसार नेपाललाई तत्काललाई नियन्त्रण लिइएको हो । अहिले भारतीय सेना प्रमुख उपेन्द्र द्विवेदी नेपाल भ्रमणमा भ्रमणमा छन् । यस्तोमा ग्रेटर नेपालको अभियान चलाइरहेका उनले कालो झण्डा देखाउने तथा विरोध प्रदर्शन गर्न सक्ने सम्भावना देखिएपछि प्रहरीले उनलाई नियन्त्रणमा लिएर निगरानीमा राखेको हो । 

भारतबाट हुने हरेकजसो औपचारिक भ्रमणमा नेपालले विरोध जनाउने गरेका छन् । त्यसक्रममा उनी पटकपटक पक्राउ पर्ने गरेका छन् । केही वर्ष पहिले भारतीय प्रधानमन्त्री नरेन्द्र मोदी नेपाल आउनुअगाडि उनलाई प्रहरीले निवासबाहिरबाटै पक्राउ गरेको थियो ।