स्वर्णलक्ष्मी सहकारीबारे बयान लिन काठमाडौं ल्याइएका जोशीलाई सरकारी वकिलको कार्यालय लगियो

६ मंसिर, काठमाडौं । स्वर्णलक्ष्मी बहुउद्देश्यीय सहकारीको बचत रकम अपचनलका सम्बन्धमा बयान लिन पूर्वडीआईजी एवं गोर्खा मिडियाका पूर्वसञ्चालक छविलाल जोशीलाई सरकारी वकिलको कार्यालय काठमाडौंमा उपस्थित गराइएको छ । 

स्वर्णलक्ष्मी सहकारीको बचत ठगी सम्बन्धमा बयान लिन उनलाई कास्कीबाट काठमाडौं ल्याइएको थियो । उनलाई बिहीबार सरकारी वकिल कार्यालय काठमाडौंमा पेश गरिएको हो । जोशीविरूद्ध काठमाडौं जिल्ला अदालतले पक्राउ पुर्जी जारी गरेपछि उनलाई मंगलबार बेलुका फ्लाइटबाट काठमाडौं ल्याइएको थियो । 

पोखराको सूर्यदर्शन सहकारी सहकारीको बचत अपचलन प्रकरणमा गत असोज ६ गते जोशी पक्राउ परेका थिए । त्यही बीचमा रूपन्देहीको सुप्रिम सहकारीको बचत हिनामिनामा संलग्न रहेको आरोपमा जिल्ला अदालतले पक्राउ पुर्जी जारी गरेपछि बयानका लागि उनलाई रूपन्देही पनि लगिएको थियो ।
 
जोशीको बयानपछि कास्की हिरासतमा रहेका रवि लामिछानेलाई पनि काठमाडौं ल्याएर यो सहकारी ठगीका विषयमा बयान लिने तयारी प्रहरीले गरेको छ । यसअघि कुमार रम्तेलसँग बयान लिएर कास्की पठाइएको छ । अब रवि लामिछानेलाई काठमाडौं ल्याइनेछ ।