३१ अंकले घटेर २७०० तल झर्यो नेप्सेः सबै सूचक घटे, ८ अर्ब २५ करोडमाथि भयो करोबार

६ मंसिर, काठमाडौं । साताको अन्तिम कारोबार दिन बिहीबार शेयरबजार दोहोरो अंकले घटेर बन्द भयो । बिहीबार शेयर बजारका सबै सूचक घटेका छन् । नेप्से परिसूचक अघिल्लो दिनको तुलनामा ३१.३१ अंक घटेको छ । सो अंकको कमीपछि २६८० मा कायम भएको छ । सेन्सेटिभ इण्डेक्स  १.१५ प्रतिशतले घटेर ४७२.९७ विन्दुमा कायम भएको छ । 

नेप्से परिसूचक दोहोरो अंकले घटेपनि कारोबार रकम भने बुधबारको तुलनामा बढेको छ । यसदिन ३१४ स्क्रिप्सको १ करोड ८४ लाख ७४ हजार २४ कित्ता शेयर ८ अर्ब २५ करोड ७६ लाख ४३ हजार ८८६ रुपैयाँमा खरिदबिक्री भए । बुधबार ८ अर्ब माथिको शेयर कारोबार भएको थियो ।

दोहोरो अंकले घटेको  सेयर बजारमा दुईवटा कम्पनीको मूल्य सकारात्मक सर्किट लेभलमा कारोबार भयो । सामुदायिक लघुवित्त वित्तीय संस्था र थ्री स्टार हाइड्रोपावरको सयर १० प्रतिशतले वृद्धि भएको हो । आज जानकी फाइनान्सका लगानीकर्ताले सर्वाधिक गुमाए । सो कम्पनीको शेयर १० प्रतिशतले घट्यो ।

फाइनान्स समूहको सूचक सबैभन्दा धेरै २.८६ प्रतिशत घट्यो । बैंकिङ ०.९०, विकास बैंक १.४७, होटल तथा पर्यटन १.७३, हाइड्रोपावर ०.९०, लगानी ०.९०, जीवन बीमा १.३६, उत्पादन १.५४, माइक्रोफाइनान्स ०.६८, निर्जीवन बीमा १.१६, अन्य १.६७ र व्यापार समूह ०.९८ प्रतिशत घटे ।

दुई कम्पनी सामुदायिक लघुवित्त र थ्रीस्टार हाइड्रोपावरको मूल्य १० प्रतिशत बढ्यो । माहुली लघुवित्तको ६.११, धौलागिरि लघुवित्तको ५.४९ तथा रिभर फल्स पावरको ५.३३ प्रतिशत बढ्यो । कारोबार रकमका आधारमा नेपाल फाइनान्स शीर्ष स्थानमा रह्यो । सो कम्पनीले २५ अर्ब माथिक शेयर कारोबार गर्यो । 

यसैगरी नगदी ग्रुपको २३ करोड,रसुवागढी हाइड्रोपावर कम्पनीको १९ करोड,हिमालयन ऊर्जा विकासको १८ करोड र कर्णाली डेभलपमेन्ट डेभलपमेन्ट बैंकको १६ करोड मूल्य बराबरको सेयर कारोबार भयो । यसदिन सबै समूहको सूचक नकारात्मक देखिए । कारोबारमा आएकामध्ये ४३ स्टक्सको मूल्य बढ्दा १९७ वटाको घट्यो । ४ समूहको उपसूचक भने नकारात्मक देखिए ।