पाकिस्तानमा सवारी साधनमा गोली प्रहार, ३८ जनाको मृत्यु

६ मंसिर, काठमाडौं । पाकिस्तानको खैबर पख्तुनख्वा प्रान्तको कुर्रम आदिवासी जिल्लामा यात्रुवाहक सवारी साधनमा गोली हानाहान भएको छ ।

यस गोलीबारीमा ३८ जनाको मृत्यु भएको जियो न्यूजले उल्लेख गरेको छ । यस घटनामा १९ जना घाइते भएका छन् । 

कुर्रम जिल्लाको मदारवी क्षेत्रमा प्रहरी निगरानीमा रहेको पारा चिनार क्षेत्रबाट केही सवारीसाधन आइरहेका थिए । सोही क्रममा ती सवारीसाधनमाथि आक्रमण भएको थियो । 

अहिलेसम्म आक्रमण कसले गरेको हो भन्ने स्पष्ट हुन नसकेको मिडिया रिपोर्टमा उल्लेख गरिएको छ । राष्ट्रपति आसिफ अली जर्दारी र प्रधानमन्त्री शेहबाज सरिफले घटनाको भर्त्सना गर्दै घाइतेको राम्रो उपचार गर्न निर्देशन दिएका छन् ।