चीनले प्रतिबद्धता जनाएको अनुदानमै समस्या छ, बीआरआईमा ऋणको सहमति गर्न सकिन्नः कांग्रेस

७ मंसिर, काठमाडौं । नेपाली कांग्रेसले चीन प्रतिबद्धता जनाएको अनुदान रकमको कार्यान्वयनमै समस्या आइरहेका बेला थप ऋणको कुरा अगाडि बढाउन नसकिने जनाएको छ । काठमाडौंमा आयोजना गरिएको देशको विद्यमान आर्थिक अवस्था र सुधारका उपायहरूबारे राखिएको छलफल पछि कांग्रेस प्रवक्ता डा. प्रकाशशरण महतले बीआरआईमा ऋण सम्झौता गर्न कांग्रेस तयार नभएको बताए । 

बीआरआईबारे कांग्रेसको धारणा प्रष्ट रहेको दोधारे नीति नभएकाले बीआरआईमा ऋण लिन हुँदैन भनेको उनले बताए । हामीले अहिले अनुदान सहयोगमा जोड दिएका छौं । चिनियाँ सरकारले अनुदानको प्रतिबद्धता गरेको धेरै बर्ष भइसक्यो, कार्यान्वयन भएको छैन । अनुदान नै कार्यान्वयन भएको छैन, अनि ऋणको कुरा गरेर के अर्थ, हाम्रो ऋणको भार पनि धेरै भएको छ, चिनियाँ सरकारसँग मात्रै होइन, कुनै सरकारसँग पनि ऋण लिने बाटोमा जान कांग्रेस तयार छैन्, उनले भने । 

महतले चिनियाँ सरकारले यसअघि प्रतिबद्धता गरेको अनुदान नै कार्यान्वयन नगरेकाले ऋणतर्फ जान नहुनेमा कांग्रेसको जोड रहेका बताए । अहिले बीआरआई परियोजनमा ऋण लिने कि नलिने भन्ने विषयमा सत्ता सहयात्री दल कांग्रेस र एमालेबीच नोकझोक चलिरहेको छ ।