कास्की प्रहरीको हिरासतमा रहेका रवि लामिछानेलाई बयानका लागि शनिबार काठमाडौं ल्याइने

७ मंसिर, काठमाडौं । विभिन्न सहकारीको रकम अपचलन गरेको आरोपमा पक्राउ परी कास्की प्रहरीको हिरासतमा रहेका राष्ट्रिय स्वतन्त्र पार्टी (रास्वपा) का सभापति एवं पूर्वगृहमन्त्री रवि लामिछानेलाई भोलि शनिबार बयानका लागि काठमाडौं ल्याइने भएको छ । प्रहरी स्रोतका अनुसार उनलाई शनिबार साँझ जहाज मार्फत काठमाडौं ल्याइनेछ । 

भोलि विदा परेकाले साँझपख मात्र रविलाई काठमाडौं ल्याउन लागिएको हो । आइतबारबाट उनको बयान सुरु हुनेछ । कालिमाटीस्थित स्वर्णलक्ष्मी सहकारी ठगी प्रकरणमा उनी पनि जोडिएका छन् । चितवनमा पनि रवि विरुद्ध पक्राउ पुर्जी जारी भएको छ । बयानका लागि काठमाडौं ल्याइएका नेपाल प्रहरीका पूर्वडीआईजी छविलाल जोशीलाई भने बयान सकेर कास्की पठाइएको छ । 

जोशीलाई मंगलबार साँझ पोखराबाट काठमाडौं ल्याइएको थियो । जोशीसँग जिल्ला सरकारी वकिल कार्यालयमा दुई दिन बयान लिइएको थियो । बयान सकिएपछि जोशीलाई शुक्रबार पोखरा फिर्ता गरिएको हो । प्रहरीका अनुसार जोशीलाई अपरान्ह त्रिभुवन अन्तर्राष्ट्रिय विमान स्थल पुर्याइएको थियो । 

अहिले काठमाडौंको स्वर्णलक्ष्मी सहकारी ठगी प्रकरणमै पक्राउ पुर्जी जारी भएपछि पोखराबाट रविलाई काठमाडौं ल्याउन लागिएको हो । यसै प्रकरण कुमार रम्तेललाई काठमाडौं झिकाएर बयान गरिएको थियो । ६४५ बचतकर्ताले जाहेरी दिएपछि यो सहकारी ठगीको प्रहरी वृत्त कालीमाटीले अनुसन्धान सुरु गरेको थियो । अहिले जिल्ला प्रहरी परिसरले कालीमाटीबाट फाइल झिकाएर अनुसन्धान गरिरहेको छ । चितवनको साहारा चितवन सहकारीमा पनि उनीहरुविरुद्ध पक्राउ पुर्जी जारी भएको छ ।