विद्युतीय प्रणालीको समस्याले गर्दा तत्काल नेपाल र विदेशस्थित नियोगबाट पनि राहदानी वितरण बन्द

७ मंसिर, काठमाडौं । विद्युतीय राहदानी प्रणालीमा समस्या आएको भन्दै सरकारले सबै निकायबाट हुने राहदानी वितरण सेवा अवरुद्ध भएको जनाएको छ । राहदानीको तथ्यांक व्यवस्थापनमा समस्या आएको र यसको समाधानका लागि समय लाग्ने राहदानी विभागले जनाएको छ । 

विद्युतीय प्रणालीको समस्याले राहदानी वितरण रोकिएको शुक्रबार राहदानी विभागले सूचना निकालेर राहदानी वितरण प्रभावित भएको जानकारी गराएको हो । राहदानी तथ्यांक व्यवस्थापनमा आएको समस्याले राहदानी विभाग, जिल्ला, इलाका प्रशासन कार्यालय र विदेशस्थित नियोगबाट राहदानी प्रवाह हुन नसकेको विभागले जनाएको छ । 

राहदानी वितरणको काम अनिश्चितकालका लागि ठप्प भएको छ । दुई दिनदेखि सेवाग्राहीले नयाँ राहदानी बनाउने काम ठप्प भएको छ । राहदानी विभागको विद्युतीय राहदानी प्रणालीमा समस्या आएपछि राहदानी वितरणको प्रक्रिया ठप्प भएको हो । यसले गर्दा तुरुन्तै रहादानी बनाएर विदेश उड्नुपर्ने र प्रक्रिया थाल्नुपर्नेहरु प्रभावित भएका छन् । हिजो बिहीबारदेखि नै राहदानी वितरणको सबै कामकाज ठप्प भएको छ ।

प्रणालीका केही कम्प्युटर सफ्टवेयरमा भाइरस छिरेको थाहा पाएपछि प्रणालीमा जोखिम नहोस् भनेर बन्द गरिएको विभागको भनाइ छ । तथ्यांकको सुरक्षा लगायतका दृष्टिबाट सबै समस्या समाधान भएपछि मात्र सेवा सुरु हुनेछ । विभागले शुक्रबार सबै जिल्ला प्रशासन कार्यालयहरुलाई पनि परिपत्र गरेर राहदानी प्रणालीमा आएको समस्या समाधान गर्न प्राविधिक समूहले काम गरिरहेको उल्लेख गरेको छ । समूहले कम्तीमा ९ मंसिरसम्म यो समस्या समाधान नहुने प्रारम्भिक निष्कर्ष निकालेको पत्रमा उल्लेख छ ।