अस्ट्रेलियाविरुद्ध भारतको कमब्याक, बुमराहले लिए चार विकेट

७ मंसिर, काठमाडौं । भारत र अस्ट्रेलियाबीचको पहिलो टेस्ट पहिलो दिनमा रोमाञ्चक बनेको छ ।अस्ट्रेलियाको पर्थमा आजदेखि शुरु भएको ५ खेलको सिरिजको पहिलो खेलमा टस जितेर पहिला ब्याटिंग गरेको भारतले १५० रन बनाउदा अल आउट भएपछि आफ्नो ब्याटिंग शुरु गरेको अस्ट्रेलियाले पहिलो दिनको खेल सकिदा ७ विकेट गुमाएर ६७ रन बनाएको छ । पहिलो दिनको खेल सकिदा अस्ट्रेलिया ८३ रनले पछाडी रहेको छ ।

अस्ट्रेलियाका लागि ट्राभिस हेडले ११ र डेभ्यु खेल खेलिरहेका नाथन म्याकस्वीनीले १० रन बनाएका थिए । त्यस्तै यस खेलमा स्टिभ स्मिथ गोल्डेन डक भएका थिए । अस्ट्रेलियाका लागि एलेक्स केरी १९ रन बनाएर खेलिरहेका छन् भने मिचेल स्टार्क ६ रन बनाएर खेलिरहेका छन् ।

अस्ट्रेलियाको शिर्ष ब्याटिंग लाइन ध्वस्त गर्नेक्रममा कप्तान जसप्रित बुमराहले ४ विकेट लिएका थिए भने मोहमद सिराजले २ तथा हर्षित रानाले एक विकेट लिएका थिए । 

यस अघि भारतका लागि डेभ्यु खेल खेलिरहेका नितिश कुमार रेड्डीले सर्वाधिक ४१ रन बनाए भने ऋषव पन्तले ३७, केएल राहुलले २६ रन बनाएका थिए ।

त्यस्तै भारतको ब्याटिंग लाइन ध्वस्त गर्नेक्रममा अस्ट्रेलियाका बलर जोश हजेलवूडले सर्बाधिक ४ विकेट लिए भने मिचेल स्टार्क, पाट कमिन्स र मिचेल मार्शले २-२ विकेट लिएका थिए ।

यस खेलमा भारतका कप्तान रोहित शर्माको अनुपस्थितिमा जसप्रित बुमराहले कप्तानी गरेका छन् ।