धितोपत्र बोर्ड अध्यक्षका लागि अधिकारी र कार्कीले दिए अन्तर्वार्ता, चापागाईं सहभागी भएनन्

९ मंसिर, काठमाडौं । नेपाल धितोपत्र बोर्ड अध्यक्षका उम्मेदवारको अन्तर्वार्ता लिइएको छ । आइतबार बिहान सिंहदरबारमा उम्मेदवारहरूको अन्तर्वार्ता तथा कार्ययोजना प्रस्तुति लिइएको हो । बोर्डको अध्यक्षका आकांक्षी डा. नवराज अधिकारी र कृष्णबहादुर कार्की अन्तर्वार्ता र प्रस्तुतीकरणमा सहभागी भए । अन्तर्वार्ता र प्रस्तुतीकरणमा सहभागी भएर अर्थ मन्त्रालयबाट उनीहरु बाहिरिएका छन् । 

अर्का आकांक्षी चिरञ्जिबी चापागाईं भने सहभागी भएनन् । अध्यक्षका लागि सर्टलिस्टमा परेका पाँचमध्ये यी तीन जनाको अन्तर्वार्ता तथा कार्ययोजना प्रस्तुति हुनसकेको थिएन । दुई उम्मेदवार सन्तोषनारायण श्रेष्ठ र मुक्तिनाथ श्रेष्ठले यसअघि नै अन्तर्वार्ता तथा कार्ययोजना प्रस्तुत गरेका छन् । अब अन्तर्वार्ता तथा कार्यायोजना प्रस्तुत गरेका चार जनामध्ये समितिले उत्कृष्टताका आधारमा कम्तीमा तीन जनाको नाम मन्त्रिपरिषद् बैठकमा सिफारिस गर्नेछ । तीमध्ये एक जनालाई मन्त्रिपरिषद्ले अध्यक्ष नियुक्त गर्नेछ ।

अध्यक्षका आकांक्षी चापागाईं फोन अफ गरेर बसेका छन् । यद्यपि, उनलाई केही समय पर्खने सिफारिस समितिले जनाएको छ । उनी आजको अन्तर्वार्ता तथा प्रस्तुतीकरणमा सहभागी नभए सहभागी चारमध्ये अध्यक्ष छनोट समितिले तीनजनाको नाम मन्त्रिपरिषदमा बुझाउनेछ । असोज १८ गते बोलाइएको अन्तर्वार्तामा सिफारिस समितिका संयोजक अधिकारी बिरामी भएपछि स्थगित भएको थियो । धितोपत्र बोर्ड २०८० पुस २० पछि कार्यकारी अध्यक्षविहीन छ ।