लामिछानेलाई थप १५ दिन हिरासतमा राख्न अनुमति

९ मंसिर, पोखरा । कास्की जिल्ला अदालतले राष्ट्रिय स्वतन्त्र पार्टी (रास्वपा) का  सभापति एवं पूर्व गृहमन्त्री रवि लामिछानेलाई थप १५ दिन हिरासतमा राख्न अनुमति दिएको छ । यसअघिको म्याद सकिएपछि आज आइतबार उनलार्य म्याद थप गर्न अदालत लगिएको थियो । अदालतले थप १५ दिन हिरासतमा राख्न अनुमति दिएको हो । सहकारी ठगी गरेको आरोपमा पक्राउ परेका उनी कास्की प्रहरीको हिरासतमा छन् ।

भीमलाल बेलबासेको इजलासले रविलाई अझै १५ दिन हिरासतमै राखेर अनुसन्धान गर्न अनुमति दिएको हो । पछिल्लोपटक गत कात्तिक २५ गते थपिएको १३ दिनको म्याद सकिएपछि आज प्रहरीले जिल्ला अदालतमा उपस्थित गराएको थियो । सहकारी ठगी प्रकरणमा अनुसन्धानका लागि उनी २ कात्तिकमा काठमाडौंबाट पक्राउ परेका थिए ।