वातावरण बिगार्ने असंवेदनशील कार्यको लागि भाजपा जिम्मेवार छ : राहुल गान्धी

१० मंसिर, काठमाडौं । उत्तर प्रदेशको सम्भल जिल्लामा आइतबार (२४ नोभेम्बर) सर्वेक्षण कार्यका क्रममा भएको हिंसालाई लिएर हंगामा भएपछि तनाव बढेको छ । दुर्घटनामा ३ जनाको मृत्यु भएको छ भने २० जना घाइते भएका छन् ।

प्रहरीका अनुसार अदालतको आदेशमा आइतबार सम्भलको जामा मस्जिदमा भएको सर्वेक्षणको विरोधमा उत्रिएका प्रदर्शनकारी र प्रहरीबीच झडप भएको थियो । यस हिंसाका क्रममा गोली हानाहान र ढुंगा हानाहानमा चार जनाको मृत्यु भएको र २० जना घाइते भएको प्रहरीले जनाएको छ ।

यसै विषयमा भारतीय कांग्रेस नेता राहुल गान्धीले हालैको विवादलाई लिएर राज्य र केन्द्र सरकारलाई निशाना बनाएका छन् । उनले ट्वीटरमा लेखेका छन्, उत्तर प्रदेश सम्भलमा हालैको विवादमा राज्य सरकारको पक्षपात र हतार रवैया अत्यन्त दुर्भाग्यपूर्ण छ। हिंसा र गोलीबारीमा आफ्ना प्रियजनहरू गुमाउनेहरूप्रति मेरो गहिरो समवेदना।

राहुल गान्धीले ट्वीटमा थप लेखेका छन्, प्रशासनले सबै पक्षहरूको कुरा नसुनी कारबाही गरेको र असंवेदनशीलताले वातावरण बिग्रियो र धेरै मानिसहरूको मृत्यु भयो - जसको लागि भाजपा सरकार प्रत्यक्ष रूपमा जिम्मेवार छ। भाजपाको शक्तिको प्रयोग भनेको हिन्दू-मुस्लिम समाजबीच दरार र विभेद सृजना गर्नु हो। न राज्यको हितमा काम गर्छ न देशको । यस विषयमा जतिसक्दो चाँडो हस्तक्षेप गरी न्याय गरिदिन सर्वोच्च अदालतलाई आग्रह गर्दछु । शान्ति र आपसी सद्भाव कायम राख्न मेरो अपिल छ । भारत साम्प्रदायिकता र घृणाको होइन, एकता र संविधानको बाटोमा अघि बढ्छ भन्ने सुनिश्चित गर्न हामी सबै एकजुट हुनुपर्छ।

सम्भल जिल्लामा ३० नोभेम्बरसम्म बाहिरी व्यक्तिलाई प्रवेशमा रोक

उत्तर प्रदेशको सम्भल जिल्लामा हिंसापछि उत्पन्न तनावलाई ध्यानमा राख्दै सम्भल तहसीलमा इन्टरनेट सेवा बन्द गरिएको छ र सोमबार कक्षा १२ सम्मका सबै विद्यालयहरू बन्द राख्न आदेश दिइएको छ। यसबाहेक जिल्लामा भारतीय न्यायिक संहिता (बीएनएस) १६३ अन्तर्गत नोभेम्बर ३० सम्म निषेधाज्ञा जारी गरिएको छ । यसअन्तर्गत नोभेम्बर ३० गतेसम्म जिल्लामा बाहिरी व्यक्तिलाई प्रवेशमा रोक लगाइएको छ ।