बीआरआइबारे देउवाले भने, प्रधानमन्त्रीले चीनसँग अनुदानको कुरा गर्नुहुन्छ, ऋण होइन

१० मंसिर, जनकपुर । नेपाली कांग्रेसका सभापति शेरबहादुर देउवाले चिनियाँ परियोजना बीआरआईमार्फत अनुदानमा सहयोग लिइने बताएका छन् । उनले प्रधानमन्त्री केपी शर्मा ओलीले चीन भ्रमणका क्रममा अनुदानका विषयमा कुरा गर्ने बताएका छन् । बीआरआईमार्फत ऋण नलिएर अनुदानमा सहयोग लिने कुरा भएको उनको भनाइ छ । 

जनकपुर विमानस्थलमा सोमबार सञ्चारकर्मीसित कुरा गर्दै उनले बीआरआई परियोजनामा कांग्रेस प्रस्ट रहेको बताए । ऋण होइन अनुदान लिनुपर्छ । बीआरआई परियोजनामा छलफल जारी छ । छिट्टै एउटा निष्कर्षमा पुगिन्छ । उनले प्रधानमन्त्री केपी शर्मा ओलीको चीन भ्रमण फलदायी हुने बताए । देउवाले सत्ता गठबन्धनमा कुनै खटपट नभएको पनि बताए । संघीय सरकारमा कुनै खटपट छैन । यो गठबन्धन रहिरहन्छ, देउवाले भने, मधेश प्रदेश सरकारको हकमा भने कांग्रेसको मात्रै निर्णयले पुग्दैन । अरु दलहरुले पनि निर्णय गर्नुपर्ने हुन्छ ।

प्रजातन्त्र सेनानी अरबिन्द ठाकुरको शालिक अनावरण गर्न उनी जनकपुर आएका हुन् । प्रधानमन्त्री केपी शर्मा ओलीको आगामी चीन भ्रमणमा बीआरआई कार्यान्वयन योजना सम्झौतामा हस्ताक्षर गर्ने कि नगर्ने भन्ने विषयमा कांग्रेस र एमालेबीच समझदारी बन्न सकेको छैन । प्रधानमन्त्री ओलीले आगामी मंसिर १७ गतेदेखि चीन भ्रमण गर्दैछन् । देउवाले अहिले देशको अवस्था ऋण लिन सक्ने नभएकाले अनुदानको कुरा गरिएको देउवाको भनाइ छ ।