बोर्डलाई एक वर्ष नेतृत्ववीहिन बनाएर ओलीले सन्तोषनारायण श्रेष्ठलाई नै बनाए धितोपत्रको अध्यक्ष

१० मंसिर, काठमाडौं । नेपाल धितोपत्र बोर्डको अध्यक्षमा सन्तोषनारायण श्रेष्ठ नियुक्त भएका छन् । उनी प्रधानमन्त्री केपी शर्मा ओलीले रुचाएका व्यक्ति हुन् । प्रधानमन्त्री नहुँदै ओलीले श्रेष्ठलाई बोर्डको अध्यक्ष बनाउन चाहेका थिए । यस विषयमा अघिल्ला प्रधानमन्त्री पुष्पकमल दाहाल प्रचण्ड र ओलीकाबीचमा नोकझोक नै चलेको थियो । 

अध्यक्ष सिफारिस समितिले बोर्डकै दुई कार्यकारी निर्देशक नवराज अधिकारी र मुक्तिनाथ श्रेष्ठसहित उनलाई पनि सिफारिस गरेको थियो । तीन जनामध्ये सोमबारको मन्त्रिपरिषद् बैठकले व्यावसायिक पृष्ठभूमिका श्रेष्ठलाई अध्यक्षमा नियुक्त गरेको हो । यसअघि गठित सिफारिस समितिले फागुनमै अध्यक्ष पदका लागि आवेदन खुलाएको थियो । १९ जनाको आवेदन परेकोमा समितिले ५ जनालाई सर्टलिस्टमा पारेको थियो ।

नेप्सेका सीईओ कृष्णबहादुर कार्की, बीमा प्राधिकरणका पूर्वअध्यक्ष चीरञ्जीवी चापागाईं, सन्तोषनारायण श्रेष्ठ तथा बोर्डका दुई कार्यकारी निर्देशक डा. नवराज अधिकारी र मुक्ति श्रेष्ठ सर्टलिस्टमा परेका थिए । सर्टलिस्टमा परेकामध्ये दुई जना मुक्तिनाथ र सन्तोषनारायणले असारको पहिलो साता नै अन्तर्वार्ता तथा कार्ययोजना प्रस्तुत गरेका थिए । तर, बाँकी तीनजना अधिकारी, कार्की र चापागाईंलाई अर्थ मन्त्रालयले दुई पटक अन्तर्वार्ता तथा कार्ययोजना प्रस्तुतिका लागि बोलाएको थियो । त्यसमा तीनै जना अनुपस्थित भए ।

२०८० पौष २० गतेदेखि धितोपत्र बोर्ड नेतृत्वविहीन बनेको थियो । एमाले अध्यक्षसमेत रहेका ओलीले सो पदमा चोप नारायण श्रेष्ठका छोरा सन्तोषनारायण श्रेष्ठलाई नियुक्ति गर्न दवाव दिएपछि २०८१ असार ६ गते बिहीबार बस्ने मन्त्रिपरिषद बैठकले नै श्रेष्ठलाई नियुक्त गर्ने प्रयास गरेको थियो । तर, केही कानुनी प्रश्न उठ्ने देखिएपछि र सो समयमा सर्टलिस्टमा परेका दुई जनाले मात्रै अन्तर्वार्ता तथा कार्ययोजना प्रस्तुत गरेको भन्दै सिफारिस समितिले मन्त्रिपरिषदमा नाम सिफारिस गर्न सकेको थिएन । नत्र श्रेष्ठ उतिबेलै अध्यक्ष भइसक्थे । 

नाम सिफारिस हुन नसकेपछि सरकारले नयाँ प्रक्रिया सुरु गर्न अर्को सिफारिस समिति बनाएको थियो । तर सर्टलिस्टमा परेका र अन्तर्वार्ता समेत दिइसकेका उम्मेदवार सन्तोषनारायण श्रेष्ठले नयाँ प्रक्रिया सुरु गर्ने कानुनी व्यवस्था नभएको भन्दै सर्वोच्च अदालतमा मुद्दा हाले । अदालतले उनले मागेजस्तै तत्काल नयाँ प्रक्रिया सुरु नगर्न अन्तरिम आदेश दियो । यसरी प्रक्रिया अवरुद्ध भई दोस्रो चरणका प्रक्रिया सुरु भएपछि पनि श्रेष्ठले निरन्तरता पाए । 

प्रचण्ड नेतृत्वको सरकार ढलेर केपी ओली नेतृत्वको नयाँ सरकार बन्यो । सरकारले अध्यक्ष नियुक्तिको पुरानै प्रक्रियालाई ब्यूँतायो । त्यसपछि सरकारले यसअघि अन्तर्वार्तामा अनुपस्थित रहेका तीन जना उम्मेदवारलाई पुनः अन्तर्वार्ता र कार्ययोजना प्रस्तुतिका लागि बोलाएको थियो । पछिल्लो अन्तर्वार्तामा पनि एक उम्मेदवार चापागाईं अनुपस्थित रहे भने दुई उम्मेदवार कार्की र अधिकारीले अन्तर्वार्ता तथा कार्ययोजना प्रस्तुत गरेका थिए । 

सिफारिस समितिले आइतबार मात्रै तीन जना उम्मेदवारहरू क्रमशः नवराज अधिकारी, मुक्तिनाथ श्रेष्ठ र सन्तोषनारायण श्रेष्ठको नाम मन्त्रिपरिषद्मा सिफारिस गरेको थियो । मन्त्रीपरिषद्ले तिनै तीन नाममध्येबाट श्रेष्ठलाई अध्यक्षमा नियुक्त गरेको हो । चोप नारायाण नेपाली कांग्रेसका नेता भएपनि सन्तोषनारायण भने ओली नजिक हुन पुगे । केही व्यवसायीक कारणले ओली र श्रेष्ठबीच सम्बन्ध बनेको हो । नियुक्ति लगत्तै श्रेष्ठको छबिमाथि शेयरबजारमा प्रश्न उठ्न थालिसकेको छ ।