आन्तरिक राजश्व विभागका तत्कालीन महानिर्देशक चूडामणि शर्माविरुद्धको मुद्दामा विपक्षी झिकाउने आदेश

११ मंसिर, काठमाडौं । सर्वोच्च अदालतले आन्तरिक राजश्व विभागका तत्कालीन महानिर्देशक चूडामणि शर्माविरुद्धको भ्रष्टाचार मुद्दामा विपक्षी झिकाउने आदेश दिएको छ । न्यायाधीशद्वय मनोजकुमार शर्मा र नृपध्वज निरौलाको इजलासले मंगलबार यो आदेश दिएको हो । 

अख्तियार दुरूपयोग अनुसन्धान आयोगले शर्माविरूद्ध कर फर्स्यौट प्रकरण र अकुत सम्पत्ति आर्जनसम्बन्धी मुद्दा चलाएको थियो । विशेष अदालतबाट कर फर्स्यौट प्रकरणमा उनी दोषी ठहर भएका थिए भने अकुत सम्पत्ति आर्जनको अभियोगमा सफाइ पाएका थिए । अब विशेष अदालतले गरेका फैसलाविरूद्ध सर्वोच्च अदालतमा दुवै तर्फबाट बहस हुने भएको छ । 

विशेष अदालतले ९ वर्ष कैद तोक्दै  बिगो र जरिवाना गरेको थियो । महतलाई ९ वर्ष १ महिना कैद तोकिएको थियो । ढकाल र शर्मालाई त्योभन्दा एक महिना कम ९ वर्ष कैद सजाय तोकिएको छ । उनीहरूले आफूलाई गैरकानुनी थुनामा राखेको भन्दै सर्वोच्चमा बन्दी प्रत्यक्षीकरणको निवेदन पनि दिएका छन् । विशेष अदालतका फैसलामा अख्तियारले पनि चित्त नबुझाएर सर्वोच्चमा पुनरावेदन गरेको छ । ती सबै निवेदन तथा मुद्दा सोमबार एकसाथ राखी हेरिएको थियो ।

शर्माले सरकारी सेवामा रहँदाको अवधिभर ३ करोड ४५ लाख ३२ हजार ३५६ रुपैयाँ बराबरको सम्पत्ति गैरकानूनी रूपमा आर्जन गरेको भेटिएको अख्तियारको दाबी छ । प्रत्येकले बिगो र जरिवाना गरी ६ अर्ब १६ करोड ४० लाख ९६ हजार ८४७ रुपैयाँ तिर्नुपर्ने विशेषको फैसला छ । हाल शर्मा र महत कारागार कार्यालय, डिल्लीबजार, काठमाडौँमा छन् ।