प्रहरीले दुर्गा प्रसाईंलाई सर्वोच्चमा उपस्थित गरायो

११ मंसिर, काठमाडौं । मेडिकल व्यवसायी दुर्गा प्रसाईंलाई सर्वोच्च अदालतमा उपस्थित गराइएको छ । किर्ते, विद्युतीय कारोबार र सम्पत्ति शुद्धीकरणसहितका अभियोगमा अनुसन्धानका लागि केही दिन अघि पक्राउ परेका प्रसाईंलाई मंगलबार अदालतमा उपस्थित गराइएको हो ।

प्रसाईं पक्राउ गरेपछि उनका छोरा नीराजनले गत मंसिर ८ गते बन्दी प्रत्यक्षीकरणको निवेदन दर्ता गरेका थिए । निवेदनमा प्रसाईंलाई गैरकानुनी रूपमा थुनामा राखेको दाबी गर्दै तत्काल रिहा गर्नु भनी अन्तरिम आदेशको माग गरेका थिए । सो निवेदनका आधारमा उनलाई सर्वोच्च अदालतमा उपस्थित गराउन आदेश भएको थियो ।   

न्यायाधीश मनोज शर्माको एकल इजलासले बन्दीसहित उपस्थित गराउन आइतबार आदेश गरेको थियो । प्रसाईंको आजै बयान गराइने छ । उनको लिखित जवाफ आज पेस भए आजै सुनुवाइ भई रिहा गर्नेबारे आदेश हुनेछ भने लिखित जवाफ पेस नभए अर्को दिन जवाफ पेस गर्नु पर्नेछ । उपचार गराउन वीर अस्पतालमा भर्ना गरिएका प्रसाईंलाई फेरी हिरासतमा फिर्ता ल्याइएको थियो ।