बयान नगराई सर्वोच्चबाट हिरासतमै फर्काइए दुर्गा प्रसाईं

११ मंसिर, काठमाडौं । मेडिकल व्यवसायी दुर्गा प्रसाईंलाई सर्वोच्च अदालतबाट बयान नगराइ फर्काइएको छ । उनलाई मंगलबार प्रहरीले आदेश बमोजिम सर्वोच्चमा उपस्थित गराएको थियो ।

प्रसाईंले कम्बोडियाको टेलिकम कम्पनीमा प्रधानमन्त्री एवं एमाले अध्यक्ष केपी शर्मा ओलीको ३२ अर्ब रूपैयाँभन्दा बढी लगानी रहेको भन्दै केही कागजात सार्वजनिक गरेका थिए । त्यसपछि उनी विद्युतीय कारोबार, किर्ते र सम्पत्ति शुद्धीकरणसहितका आरोपमा भक्तपुरस्थित निवासबाट यही मंसिर ४ गते पक्राउ परेका थिए ।   

उनका छोरा निराजनले यही मंसिर ८ गते दायर गरेको बन्दीप्रत्यक्षीकरणको रिटमा न्यायाधीश डा. मनोज शर्माको इजलासले गएको आइतबार बन्दी उपस्थित गराउने आदेश जारी गरेको थियो । आदेशानुसार उपस्थित गराइएका प्रसाईंको बयान भने भएन । बुधबार पेसी राखिने र बयान पनि हुने बताइएको छ । बयान नभएपछि प्रसाईंलाई प्रहरी हिरासतमै फर्काएको छ ।