प्रधानमन्त्रीको भ्रमण र बीआरआईबारे कांग्रेसमा छलफल

१२ मंसिर, काठमाडौं । नेपाली कांग्रेसका सभापति शेरबहादुर देउवाले प्रधानमन्त्रीको चीन भ्रमण र त्यसका एजेण्डाबारे छलफल गर्न कांग्रेसका पदाधिकारीसहित शीर्ष नेपाललाई बुढानिलकण्ठमा बोलाएर छलफल गरेका छन् । चीनको महत्वकाक्षी परियोजना बेल्ट एन्ड रोड इनिसिएटिभ (बीआरआई) बारे निर्णय लिन देउवाले कांग्रेस छलफल राखेका हुन् । 

सभापति देउवाको निवासमा  बुधबार बिहान कांग्रेसका शीर्ष नेताहरु बीआरआईका बारेमा छलफल गरिरहेका छन् । बैठकमा सभापति देउवासहित पूर्णबहादुर खड्का, गगन थापा, विश्वप्रकाश शर्मा, प्रकाशशरण महत, सिटौलालगायत सहभागी छन् । प्रधानमन्त्री केपी शर्मा ओली चीन भ्रमको तयारीमा रहेका बेलामा बीआरआईले चर्चा पाएको छ । 

कांग्रेसले बीआरआईका नाममा ऋण लिन नहुने बताउँदै आएको छ । सतप्रतिशत अनुदान भए लिने नत्र लिन नहुने पक्षमा कांग्रेस छ ।

प्रधानमन्त्री ओलीले पनि सार्वजनिक कार्यक्रममा चीन भ्रमणका क्रममा ऋणसम्बन्धी सम्झौता नहुने बताइसकेका छन् । बैठकमा परराष्ट्रमन्त्री आरजु राणा देउवाको चीन भ्रमणबारे पनि छलफल चलेको छ ।