दुर्गा प्रसाईंको मुद्दामा आज बयान र बहस हुने

१२ मंसिर, काठमाडौं । मेडिकल व्यवसायी दुर्गा प्रसाईंको मुद्दामा सर्वोच्च अदालतमा आज बहस हुँदैछ भने बयान पनि आज लिइने भएको छ । मंगलबार उनलाई अदालत उपस्थित गराइए पनि बयान लिइएको थिएन । साइबर अपराधमा पक्राउ परेका प्रसाईंलाई गैरकानुनी थुनामा राखिएको दाबीसहितको बन्दी प्रत्यक्षीकरणको निवेदन दर्ता भएको थियो । 

आज यसको पेशी न्यायाधीशद्धय महेश शर्मा पौडेल र नित्यानन्द पाण्डेयको संयुक्त इजलासमा तोकिएको  छ । यसअघि मनोजकुमार शर्माको एकल इजलासले बन्दीसहित उपस्थित हुन आदेश जारी गरेको थियो । प्रसाईंलाई थुनामुक्त गर्न माग गर्दै गत शुक्रवार उनका छोरा नीराजन प्रसाईंले सर्वोच्चमा निवेदन दिएका थिए । उक्त निवेदनमा अदालत उपस्थित गराउन आदेश गरेपछि मंगलबार उनलाई सर्वोच्च उपस्थित गराइएको थियो ।