चीन भ्रमणमा जान लागेका प्रधानमन्त्रीलाई कांग्रेसको सुझावः बीआरआईमा ऋण नलिनु, अनुदान लिनु

१२ मंसिर, काठमाडौं । नेपाली कांग्रेसले चीन भ्रमणमा जान लागेको प्रधानमन्त्री केपी शर्मा ओलीलाई चीन ऋण नभई अनुदानमा जोड दिन सुझाव दिएको छ । बुधबार सभापति शेरबहादुर देउवाको निवास बुढानिलकण्ठमा बसेको पदाधिकारी तथा शीर्ष नेताको बैठकले चीन सरकारको महत्वकांक्षी योजना बेल्ट एन्ड रोड इनिसियटिभ (बीआरआई) मा अनुदान मात्र लिन सुझाव दिएको हो । 

बैठकका निर्णयबारे जानकारी दिँदै कांग्रेस प्रवक्ता डा. प्रकाशशरण महतले अहिले चीनसँग मात्र नभएर कुनै पनि देशबाट ऋण लिन नहुने निष्कर्ष निकालिएको बताए । महतका अनुसार कांग्रेसले कुनै पनि अवस्थामा बीआरआई ऋणमा लिन नसक्ने बैठकको निर्णय भएको बताए । चीनसँगका विगतकै योजना कार्यान्वयनमा नगएका उदाहरण धेरै भएको भन्दै कांग्रेसले तत्काल बीआरआई ऋणमा लिएर राज्यलाई भार थोपर्न नसक्ने निष्कर्ष निकालेको उनले बताए ।  

अनुदानमा लिन्छौँ ऋण उपयुक्त छैन भन्ने कांग्रेसको स्पष्ट भनाई हो । प्रधानमन्त्रीलाई पनि अहिले बीआरआईमा ऋण नभएर अनुदानमा जोड दिन सुझाव दिएको बताए । प्रवक्ता महतले बीआरआईमा के–के आधारमा सम्झौता गर्ने भनेर सरकारलाई सुझाव दिइएको जानकारी दिए । पहिले एमओयु भएको छ‚ अहिले डिटेल गर्नुपरेन । अनुदान टेक्निकल सपोर्ट र ग्राण्ड फाइनान्सिङको आधारमा विभिन्न प्रोजेक्टहरू सुरूङमार्ग‚ नाका जोड्ने सडकका कुराहरू भए ती कनेक्टिभिटी आयोजनालाई बीआरआई अन्तर्गत ग्राण्ड फाइनान्सिङमा कार्यान्वयन गर्न सकिने उनले बताए । 

कांग्रेसले दिएको सुझाव मात्र हो फाइनल गर्ने सरकारले हो । ऋण हुँदैन भनेका छौँ, उनले भने । बीआरआईमा नेपालले सन् २०१४ मा सैद्धान्तिक सहमति जनाएको हो । सन् २०१७ मे १२ मा नेपाल र चीनबिच बीआरआई फ्रेमवर्क समझदारी पत्रमा हस्ताक्षर भएको थियो । कांग्रेस सरकारमा रहँदा त्यसबखत सम्झौता पत्रमा हस्ताक्षर भएको हो । 

तत्कालीन सरकारका परराष्ट्रमन्त्री प्रकाशशरण महतले उक्त सम्झौतामा हस्ताक्षर गरेका थिए । आजको बैठकमा पार्टी सभापति शेरबहादुर देउवा सहित उपसभापति पूर्णबहादुर खड्का‚ महामन्त्रीद्वय गगन थापा र विश्वप्रकाश शर्मा, परराष्ट्रमन्त्री आरजू राणा देउवा, गृहमन्त्री रमेश लेखकलगायतको उपस्थिति रहेको थियो ।