महोत्तरी र पर्साका सीडीओमाथि कारवाहीको तयारी, मन्त्रालयमै बोलाएर गृहमन्त्रीले सोधे स्पष्टीकरण

१२ मंसिर, काठमाडौं । गृह मन्त्रालयले महोत्तरी र पर्साका प्रमुख जिल्ला अधिकारीमाथि कारवाहीको तयारी गरेको छ । उनीहरुलाई कारवाही गर्नु अगाडि बुधबार स्पष्टीकरण सोधिएको छ । गृह मन्त्रालय स्रोतका अनुसार गृहमन्त्री रमेश लेखकले उनीहरुलाई मन्त्रालयमै बोलाएर स्पष्टीकरण लिएका हुन् । 

महोत्तरी र पर्साका प्रमुख जिल्ला अधिकारीमाथि विभिन्न प्रश्न उठेका थिए । त्यसबारे गृहमन्त्रीले सोधपुछ गर्नुभएको हो, स्रोतले भन्यो । दुई सीडीओसँग गृहमन्त्रीले आज मौखिक स्पष्टीकरण मागेका हुन् । थप आवश्यक परे उनीहरूसँग लिखित रुपमै स्पष्टीकरण मागिनेछ । महोत्तरीका प्रमुख जिल्ला अधिकारी लालबाबु कवारी र पर्साका प्रमुख जिल्ला अधिकारी गणेश अर्याललाई मन्त्री लेखकले मंगलबार मन्त्रालयमा बोलाएका थिए । 

अख्तियार दुरूपयोग अनुसन्धान आयोगले मंसिर ७ गते महोत्तरी प्रशासनका नायव सुब्बा अशोककुमार यादवलाई २० हजार रुपैयाँ घुससहित पक्राउ गरेको विषयमा कवारीसँग सोधिएको थियो । कवारीलाई गृहमन्त्रीले कारवाही हुने चेतावनी पनि दिएका छन् । पर्साका सीडीओ अर्यालले एक सुत्केरीको विषयमा दिएको अभिव्यक्तिलाई लिएर स्पष्टीकरण सोधिएको थियो । 

उनले गत कात्तिक ३० गते एक कार्यक्रममा सुत्केरीको मृत्यु भएको घटनामा चिकित्सकलाई लक्ष्य गर्दै अभिव्यक्ति दिएका थिए । त्यसपछि उनलाई हटाउन दवाव परेको थियो । उनले आफू भए अस्पतालमा नै आगजनी गर्ने जस्ता अभिव्यक्ति दिएका थिए । मंसिर ३ गते नेपाल चिकित्सक संघले गृहमन्त्री लेखकलाई भेटेर नै ध्यानाकर्षण गराएको थियो ।