प्रधानमन्त्रीको चीन भ्रमणअघि रक्षामन्त्री र सेनापतिले किन गरे सीमा क्षेत्र दार्चुला-तिंकर सडकको अवलोकन ?

१३ मंसिर, काठमाडौं । प्रधानमन्त्री केपी शर्मा ओली मंसिर १७ गते चीन भ्रमणमा जाने तयारी तीब्र रुपमा भएको छ । भ्रमणको तयारीका लागि परराष्ट्रमन्त्री आरजु राणा देउवा आजै चीन जाने कार्यक्रम तय भएको छ ।

तर प्रधानमन्त्री ओली चीन भ्रमणमा जानु अघि रक्षा मन्त्री मानवीर राईले प्रधानसेनापति अशोकराज सिग्देललाई लिएर नेपाल भारत सीमा क्षेत्रको सडक निर्माणको अवस्थाबारे निरीक्षण भ्रमण गरेका छन् ।

साथमा भौतिक पूर्वाधार तथा यातायात मन्त्री देवेन्द्र दाहाल पनि थिए । उनीहरुले महाकाली कोरिडोर अन्तर्गत निर्माणाधीन दार्चुला–तिङ्कर सडक निरीक्षण गरेका हुन । टोलीमा प्रतिनिधिसभा सदस्य एवं पूर्वमन्त्री दिलेन्द्रप्रसाद बडु पनि सहभागी भएका थिए ।  

टोली नेपाली सेनाको हेलिकोप्टरमार्फत व्यास गाउँपालिका–१ छांगुरु पुगेको थियो । उनीहरुको यो भिजिटलाई भारतीय मिडियाहरुले रणनीतिक महत्वसँग जोडेर हेरेका छन् । साथै यो विषयलाई भारतले पनि नोटिसमा लिएको छ । ‘भौतिक पूर्वाधार मन्त्री आउनुलाई सामान्य रुपमा लिइन्छ तर रक्षामन्त्री नै आएकाले रणनीतिक महत्वको सन्देश दिने खोजेको बुझिन्छ’, एक सुरक्षा अधिकारीले दार्चुलाबाट भने ।

बुधबार सो टोलीले छांगुरुमा स्थानीयसँग छलफल गरेको थियो । छांगुरुबाट सुनेसरास्थित नेपाली सेनाको गणमा बसेर ब्रिफिङ लिने कार्यक्रम भएको थियो । निरीक्षणपछि दार्चुला–तिङकर सडकलाई छुट्टै योजनाको रूपमा अघि बढाउने प्रतिबद्धता व्यक्त गरिएको छ । साथै सडक निर्माणका लागि त्यहाँ हेलिकोप्टरबाट डोजर लैजाने निर्णय पनि भएको छ ।

त्रिदेशीय सडकका रूपमा रहेको दार्चुला–तिङ्कर सडक सामरिक महत्व बोकेको सडक भएकाले डोजर केही दिनमै लगिने गरी तयारी थालिएको हो । २०७७ माघ २८ देखि सडक निर्माण सुरु भएको हो । यस सडकको तुसारपानी–तिङ्करको ट्रयाक खोल्नुपर्ने ७९ किमीमध्ये हालसम्म सेनाले १३.५९ किमी मात्र ट्रयाक खुलाइएको छ ।

यस आयोजनाका लागि चालु आर्थिक वर्षमा सरकारले नौ करोड बजेट विनियोजन गरेको छ । उक्त रकमले १.८ किमी नयाँ ट्रयाक खोल्ने र १.२ किमी सडक स्तरोन्नति गर्ने लक्ष्य सेनाको छ । यो सडक कञ्चनपुरको ब्रह्मदेवदेखि दार्चुलाको तिङ्करसम्म चार सय २५ किमि छ ।