उद्योगमा जोडिएको लाइन काट्न नपाएपछि उद्योगीका घरतिर लागे कुलमान, आयोगसँग मागे अनुमति

१३ मंसिर, काठमाडौं । डेडिकेटेड र ट्रंकलाइनको बक्यौता नतिर्ने उद्योगको लाइन काट्न नपाएपछि नेपाल विद्युत प्राधिकरणका कार्यकारी निर्देशक कुलमान घिसिङले उद्योगीहरुको घरको लाइन काट्न विद्युत नियमन आयोगसँग अनुमति मागेका छन् । उद्योग सञ्चालकहरूको घरको लाइन काट्ने योजना बनाएर घिसिङ आयोगसँग अनुमति मागेका हुन् । 

घिसिङले बुधबार बक्यौता नतिर्ने उद्योगका सञ्चालकहरूको घरको बिजुली काट्ने सहमतिका लागि विद्युत नियमन आयोगलाई पत्र पठाएको छन् । वैकल्पिक उपाए अपनाएर, दवाव दिएर बक्यौता उठाउन नियमन आयोगबाट सहमति लिन चाहेको उनको भनाइ छ । उनी जसरी पनि बक्यौता उठाएर छाड्ने तयारीमा छन् । 

प्राधिकरणले नियमन आयोगलाई लेखेको पत्रमा ‘नेपाल विद्युत वितरण नियमावली,२०७८ को विनियम ३१ को उपविनियम (१) र उपविनियम (३) मा भएको व्यवस्था बमोजिम बक्यौता असुल उपर गर्ने दायित्व बोकेको प्राधिकरणले बक्यौता महसुल रहेका सम्बन्धित उपभोक्ता (संस्था÷कम्पनी) का सञ्चालकहरूको आवासमा समेत लाइन काटी असुल उपर गर्नुपर्ने’ भनिएको छ ।

मंगलबार विद्युत नियमन आयोगले उद्योगमा लाइन काट्ने बाहेकको वैकल्पिक उपाय अपनाएर बक्यौता उठाउन निर्देशन दिएको थियो । अहिले बक्यौता रहेका उद्योगका सञ्चालकको विवरण संकलन गरिँदैछ ।   यसअघि मन्त्रिपरिषदले १५ दिनभित्र टीओडी मिटरको बिल अनुसार बक्यौता उठाउन निर्देशन दिएको थियो । जसको समय हिजो बुधबार नै सकिएको छ । त्यसअघि आयोगले उद्योगहरूमा लाइन नकाट्न निर्देशन दिएपछि प्राधिकरण सञ्चालक समितिको बैठक बसेर उद्योगमा लाइन नकाट्ने निर्णय गरेको थियो । 

प्राधिकरणले ३४ उद्योगको खाता रोक्का गर्न अनुरोध गर्दै नेपाल राष्ट्र बैंकलाई बुधबार नै पत्र लेखेको छ । प्राधिकरणले डेडिकेटेड फिडर तथा ट्रंकलाइन प्रयोग गरेर प्रिमियम महसुल नतिरेको भन्दै ३४ उद्योगको खाता रोक्का गर्न आग्रहसहित राष्ट्र बैंकमा पत्राचार गरेको हो । शेयर कारोबार रोक्का गर्न पनि घिसिङले पत्र पठाएका छन् ।