स्वर्णलक्ष्मी सहकारीको १ अर्ब ११ करोड ठगी, बयान लिन रविलाई आज साँझ काठमाडौं ल्याइँदै

११ मंसिर, काठमाडौं । राष्ट्रिय स्वतन्त्र पार्टी (रास्वपा) का सभापति एवं पूर्वगृहमन्त्री रवि लामिछानेलाई कास्कीबाट काठमाडौं ल्याइन लागेको छ । सहकारी प्रकरणमा पक्राउ परेका लामिछानेलाई बिहीबार साँझ ५ः३० बजे बुद्ध एयरबाट काठमाडौं ल्याइने भएको हो । जिल्ला प्रहरी कार्यालय कास्कीका एसपी श्यामबाबु ओलियाले ५ बजे हवाई मार्गबाट काठमाडौं लाने तयारी गरिएको तर, टिकट आइनसकेको बताए । 

काठमाडौंमा स्वर्णलक्ष्मी सहकारीको रकम हिनामिनामा रविलाई पनि आरोपित गरेर जाहेरी दिइएको छ । यसैको अनुसन्धानका लागि काठमाडौं ल्याउन लागिएको हो । उनी विरुद्ध काठमाडौं जिल्ला अदालतले पनि पक्राउ पूर्जी जारी गरिसकेको छ ।

रविलाई अनुसन्धानका लागि लैजान लागिएको काठमाडौं तेस्रो जिल्ला हो । सहकारी ठगी प्रकरणमा अनुसन्धानका लागि उनलाई कास्की प्रहरीको हिरासतमा राखिएको थियो । काठमाडौंको स्वर्णलक्ष्मी सहकारीको रकम अपचलनका विषयमा बयान लिन उनलाई काठमाडौं ल्याइन लागेको हो । यो सहकारीको १ अर्ब ११ करोड १८ लाख ५८ हजार रकम हिनामिना भएको छ । 

पोखराको सूर्यदर्शन सहकारीसँग सम्बन्धित बयान सकिएकाले काठमाडौंको कालिमाटीस्थित स्वर्णलक्ष्मी सहकारी ठगीसँग सम्बन्धित रहेर थप बयान लिन उनलाई काठमाडौं ल्याइएको प्रहरीले जनाएको छ । काठमाडौं महानगरपालिका–१४, कालिमाटीमा मुख्य कार्यालय रही न्युरोड, महाराजगन्ज, स्वयम्भू र जोरपाटीमा शाखा खोली ६ हजार ६ सय ६९ जनाबाट स्वर्णलक्ष्मी सहकारीले २ अर्ब ६५ करोड ९५ लाख ५९ हजार ५८ रुपैयाँ बचत संकलन गर्दा १ अर्ब ११ करोड १८ लाख हिनामिना भएको छ । 

ठगीको अनुसन्धान गर्दा यसमा जीबी राईसहित स्वर्णलक्ष्मीका पदाधिकारी संलग्न देखिएका थिए । स्वर्णलक्ष्मीबाट ११ कम्पनीमा सहकारीको बचत लगेको देखिएको छ । स्वर्णलक्ष्मी सहकारीको बचत अपचलनको आरोपमा काठमाडौं जिल्ला अदालतले यही मंसिर २ मा लामिछानेविरुद्ध पक्राउ पुर्जी जारी गरेको थियो । बयान सकिएपछि उनलाई पुनः कास्की नै पठाइनेछ । 

बुटवलको सुप्रिम सहकारीको बचत अपचलनमा पनि जोडिएका लामिछानेलाई यसअघि रूपन्देहीको जिल्ला सरकारी वकिल कार्यालयमा बयानका लागि लगिएको थियो । लामिछाने लगायतविरुद्ध चितवनमा पनि पक्राउ पुर्जी जारी भएको छ । प्रहरीले रविलाई चितवन पनि लानेछ ।