१२७ रनमै अलआउट भयो विराटनगर किंग्स

१५ मंसिर, काठमाडौं । नेपाल प्रिमिर लिग (एनपीएल) को उद्घाटन खेलमा विराटनगर किंग्स १२७ रन बनाएर अलआउट भएको छ । टस हारेर पहिले ब्याटिङको निम्तो पाएको विराटनगरलाई जनकपुर किंग्सले १९ ओभरमा अलआउट गरेको हो ।

विराटनगरलाई अलआउट गर्ने क्रममा जनकपुरका  ललित राजबंशीले तीन , किशोर महतो र हर्ष ठाकरले दुई÷दुई तथा बेन माइक र मोहम्मद मोसिनले एक÷एक विकेट लिए । विराटनगरका मार्टिन गप्टिलले ५५ रन बनाएर आउट भए । पहिलो पटक नेपालमा आएर फ्रेन्चाइज लिग खेलेका गप्टिलले ४३ बल खेल्दै ७ चौका र १ छक्का प्रहार गरे ।

६ रनमै लोकेश बमलाई पहिलो विकेटको रुपमा गुमाएको विराटनगरक लागि गप्टिल र आकिब इल्यासले ४७ रनको साझेदारी गर्दै इनिङ्स उकासेका थिए । तर इल्यास पनि १५ रन बनाएर आउट भए । त्यसपछि आएका ब्याटरले गप्टिललाई राम्रो साथ दिन सकेनन् । निकोलस किर्टोन ९, बसिर अहमद ७ र राजेश पुलामी मगर १ रनमा आउट भए ।

जनकपुरका लागि नेपाली स्पीनर ललित राजवंशीले उत्कृष्ट बलिङ गरे । ललितले पनि ४ ओभरमा २८ रन खर्चेर सर्वाधिक ३ विकेट लिए । यस्तै क्यानडियन अलराउण्डर हर्श थाकेरले ४ ओभरमा २२ रन खर्चेर २ विकेट लिए ।