२ बजेसम्ममा ५० प्रतिशत भन्दा धेरै मत खस्योः आयोग

१६ मंसिर, काठमाडौं । निर्वाचन आयोगले जारी स्थानीय तहको उपनिर्वाचनमा अहिलेसम्म ५० प्रतिशत मत खसेको जनाएको छ । सबै निर्वाचन अधिकृतको कार्यालयबाट प्राप्त विवरणअनुसार ५० प्रतिशत मत खसेको आयोगले जनाएको छ । यो दिउँसो २ बजेसम्मको विवरण हो । 

आयोगका अनुसार कुन स्थानीय तहमा कति मत खस्यो भन्ने विवरण भने आइसकेको छैन । उनका अनुसार स्थानीय तहको भन्दा पनि वडाको मत खसेको विवरण आयोगलाई प्राप्त भएको र उक्त विवरणका आधारमा अहिलेसम्म करिब ५० प्रतिशत मत खसेको पाइएको हो ।

आइतबार बिहान ७ बजेबाट सुरु भएको मतदान दिउँसो २ बजेसम्म समग्रमा ५० प्रतिशत बढी मतदान सम्पन्न भएको हो । निर्वाचन आयोगका प्रवक्ता नीता पोखरेलका अनुसार मतदान सुरु भएको ७ घण्टाको अवधिमा ५० प्रतिशत बढी मत खसेको हो । आयोगले मतदानको रेसियो हेर्दा ६० प्रतिशत बढी मत खस्ने अनुमान गरेको छ । यो उपनिर्वाचनमा २ लाख २६ हजार ७९९ मतदाताले मताधिकार प्रयोग गर्दैछन् ।