संस्थापन पक्षको दवाव रहे पनि कोइराला पक्षले विराटनगरमा डाकेको पालिका सभापति भेला नरोकिने

१८ मंसिर, विराटनगर । नेपाली कांग्रेसका वरिष्ठ नेता डा. शेखर कोइराला पक्षले विराटनगरमा आज पालिका सभापतिहरूसँग वृहत् छलफल राखेको छ । यो छलफललाई रोक्न कांग्रेसको संस्थापन पक्षले दवाव दिएको थियो । तर, कोइरालाले सबै तयारी भइसकेको भन्दै छलफल नरोकिने जनाएको छ ।  

कोइराला पक्षका नेताहरूले देश र स्थानीय तहको पछिल्लो समयको अवस्थाबारे जानकारी लिन पालिका सभापतिहरूलाई छलफलका लागि बोलाइएको बताएका छन् । उनीहरुको भनाइमा यो कुनै पक्ष र विपक्षको भेला नभएर कांग्रेसका नेताले कांग्रेसबाट पालिकामा प्रतिनिधित्व गर्ने सभापतिहरूसँग छलफल गर्न लागेको हो । यस छलफलले कांग्रेसको कुनै पक्ष वा नेतालाई प्रभाव नपार्ने उनीहरुको दावी छ । 

यसअघि सोमबार कांग्रेसको संस्थापन पक्षले कोशी प्रदेशका सबै जिल्ला सभापतिहरूलाई पत्राचार गर्दै औपचारिक रूपमा मंसिर २२ गतेदेखि आयोजना गरिएको भेला नै आधिकारिक हुने जनाएको थियो । कोइराला पक्षका विराटनगर सभापति दीपक चापागाईँले यो भेला रोक्नुपर्ने कुनै कारण नभएको बताएका छन् । केन्द्रले पत्रमार्फत भेला रोक्नु नभनेको उनको दावी छ । केन्द्रीय समितिको कार्यक्रम नभएको विषय मात्रै पत्रमा उल्लेख भएको र सही नै भएको बताएका छन् ।  

भेलामा सहभागी हुनका लागि १ सय १३ पालिकाका सभापतिहरूले नाम दर्ता गरिसकेको बताइएको छ । १ सय १३ पालिकाका सभापतिहरू विराटनगर जम्मा भइसकेका छन् । नेपाली कांग्रेस केन्द्रीय कार्यालयका मुख्य सचिव कृष्णप्रसाद पौडेलले पठाएको पत्रको कुनै अर्थ नहुने कोइराला पक्षको भनाइ छ ।  बिराटनगरस्थित कोइराला निवासमा नेता कोइरालासँग नेपाली कांग्रेस महानगरपालिका सभापतीहरु– निलकाजी शाक्य–काठमाडौ, सुरेन्द्रमान बिजुक्छे–पोखरा, सुवानन्द धाख्वा–ललितपुर, मणिन्द्रराज नेपाली–बिरगंज र दीपक चापागाईंले बिहान एकचरण छलफल पनि गरेका छन् ।