राैतहटमा पनि गढीमाइ मेला, कार्यवाहक प्रधानमन्त्रीद्वारा मेलाको उदघाटन

१८ मंसिर, रौतहट । कार्यवाहक प्रधानमन्त्री तथा सहरी विकास मन्त्री प्रकाशमान सिंहले रौतहटको पूर्व भेग गढीमाई नगरपालिका  ४ सुन्दरपुर स्थित गढीमाई मन्दिरमा लागेको पञ्चवर्षीय मेला महोत्सव २०८१ को उद्घाटन गरेका छन् ।

मंगलवार एक समारोहकाबीच प्रमुख अतिथि कार्यवाहक प्रधानमन्त्री सिंहले सुन्दरपुर गढीमाई मेलाको विधिवत् रूपमा उद्घाटन गरेका हुन। उद्घाटन समारोहमा कावा प्रधानमन्त्री सिंहका साथै नेपाली कांग्रेसका संघीय सांसद देवप्रसाद तिमल्सिना, पार्टी मधेश प्रदेशका सभापति पूर्व मन्त्री कृष्ण प्रसाद यादव, मधेश प्रदेशका अर्थमन्त्री सुनिल कुमार यादव, प्रदेश सांसद अबुल कलाम आजाद, गढीमाई नगर पालिकाका मेयर श्यामप्रसाद यादव, माधव नारायण नगरपालिका मेयर बैजनाथ प्रसाद यादव, गरुडा नगर पालिकाका मेयर कन्थमणि प्रसाद जयसवाल लगायतको सहभागिता रहेको थियो।

विश्व प्रसिद्ध बारा स्थित गढीमाई मेलाकै तिथि मितिमा वृहत् रुपमा सुन्दरपुर गढीमाई मेलाको आयोजना गरिएको छ। सुन्दरपुर स्थित गढीमाई मन्दिरमा विगत झै यसपटक पञ्चवर्षीय मेलाको आयोजना गरिएको हो। मेला मूल समितिका अध्यक्ष एवं गढीमाई नगरपालिकाका मेयर श्याम प्रसाद यादवले सुन्दरपुर गढीमाई मन्दिरमा हिजो सोमवार देखि मङसिर २६ गतेसम्म मेला लाग्ने बताएका छन्।

स्थानियहरुको अनुरोधमा मेलालाई वृहत् तथा सभ्य र भव्य बनाउन मङसिर २० गते बिहिबार भारतीय भोजपुरी सुपरस्टार कलाकार खेसारीलाल यादवलाई बोलाइएको मेयर यादवले बताएका छन्। सुपरस्टार खेसारीलाल सँगै भारतीय भोजपुरी मोडेल माही र मनिषाको पनि सांगीतिक प्रस्तुति हुने जनाइएको छ।

भारतीय कलाकारका साथै नेपालका हिन्दी गीत संगीत प्रस्तुत गर्ने कलाकार, टिकटक स्टारहरु संगै स्थानीय भाषामा प्रस्तुत हुने अलहा रुदलको नाच प्रदर्शन हुने सुन्दरपर गढीमाई मेला समितिका प्रवक्ता वडा अध्यक्ष दीपेन्द्र श्रेष्ठले बताएका छन्। बारा गढीमाई सरह सुन्दरपुर गढीमाई मन्दिरमा  मूल तान्त्रिकले आफ्नो सरीरको ५ स्थानबाट रगत निकालेर देवी लाई चढाएपछि पशु बलि प्रदान सुरु हुन्छ। मन्दिरमा राँगा, बोका, परेवाको बलि दिइने गरिन्छ।

यस मन्दिरमा पनि बलि सुरु हुनु अघि मुसा, परेवा, बोका, राँगा र खरायो गरी पञ्चबलिका रूपमा देवीलाई अर्पित गर्ने परम्परा रहेको छ। मेला भर्न आउने भक्तजनको लागि ६० वटा घुम्ती शौचालय र करिव पाँच सय अस्थायी शौचालय निर्माण गरिएको समितिले जनाएको छ। सयौं स्वयंसेवक सँगै नेपाल प्रहरी र सशस्त्र प्रहरी मेला तथा आउने भक्तजनको सुरक्षाका लागि परिचालन गरिएको मेला समितिका प्रवक्ता श्रेष्ठले जानकारी दिएका छन्।

६५ बर्ष अघि स्थानीय धामी झाँक्री जागा ठाकुरले सपनामा गढीमाईको दर्शन गरेपछि माताकै आदेशमा सुन्दरपुरमा सोही समय स्यानो मन्दिर निर्माण गरी पूजा पाठ सुरुगरेका थिए। प्रत्येक पाँच बर्षमा त्यहाँ मेलाको आयोजना हुँदै आएको छ। 

स्थानीय निकायको निर्वाचन पछि गढीमाई नगरपालिकाको मेयरपदमा पहिलो पटक श्याम प्रसाद यादव निर्वाचित भएपछि सुन्दरपुर गढीमाईको मन्दिर निर्माण देखी वृहत् रुपमा मेलाको आयोजना हुँदै आएको छ। मेयर पदमा श्यामप्रसाद यादव दोस्रो पटक निर्वाचित भएका हुन्। सुन्दरपुर मन्दिरका मुल पुजारी जागा ठाकुरको निधन पछि उनको छोरा रामदेव ठाकुर मुल पुजारी रहेका छन्।

रौतहटको सुन्दरपुर गढीमाई मेलामा अघिल्लो पटक साढे ७ सय राँगाको बली चढेको प्रवक्ता दीपेन्द्र श्रेष्ठले जानकारी दिएका छन्।  मेलामा छिमेकी जिल्लाहरू सर्लाही, महोत्तरी, बारा लगायत सीमावर्ती भारतबाट लाखौँ मानिस आउने गरेको आयोजकले जनाएको छ। दर्शन गर्न आउने बाहिरका भक्तजन तथा आगन्तुकलाई मेला समितिको तर्फबाट निःशुल्क खाना र बस्ने व्यवस्था मिलाइएको सुन्दरपुर गढीमाई मेला समिति रौतहटले जनाएको छ।