रवि लामिछानेको दोस्रो दिनको बयान सुरु

१९ मंसिर, काठमाडौं : राष्ट्रिय स्वतन्त्र पार्टी (रास्वपा) का सभापति तथा पूर्वगृहमन्त्री रवि लामिछाने विरुद्धको दोस्रो दिनको बयान सुरु भएको छ ।

सहारा चितवन सहकारी ठगी प्रकरणमा मुछिएका लामिछानेको बुधबार सरकारी वकिलको कार्यालयमा जिल्ला न्यायाधिवक्ताको शान्ति प्रसाद लुइँटेलको रोहबरमा दोस्रो दिनको बयान सुरु भएको हो । उनको बयान आजै सक्ने तयारी रहेको जिल्ला प्रहरी कार्यालय चितवनका प्रवक्ता भेष राज रिजालले जानकारी दिएका छन् ।  

उनका अनुसार चितवनमा पनि सहकारी ठगीको उजुरी परेपछि लामिछानेलाई मंगलबार बिहान चितवन लगेर बयान लिइएको भएपनि सकिएको थिएन । चितवनमा सहारा चितवन सहकारी लिमिटेडको रकम हिनामिना गरेको आरोपमा लामिछानेविरुद्ध गत मंसिर ५ गते पूरक जाहेरी दर्ता भएको थियो गत कात्तिक २ गते काठमाडौंबाट पक्राउ परेका लामिछानेलाई सोही दिन कास्की लगिएको थियो ।

त्यसपछि रुपन्देही र काठमाडौंमा बयान सकेर उनलाई मंगलबार चितवन लगिएको हो । यसअघि पूर्वडीआइजी छविलाल जोशी र रामबहादुर खनाललाई पनि चितवन लगेर बयान गराइएको थियो ।