न्यायाधीश प्रधानसँग जोडिएको कांग्रेस नेता ढुंगानाविरुद्धको रिटमाथि आज पनि सुनुवाइ भएन

१९ मंसिर, काठमाडौं । नेपाली कांग्रेसका नेता एवं राष्ट्रिय सभाका सदस्य आनन्दप्रसाद ढुंगानाविरुद्ध सर्वोच्च अदालतमा परेको रिटमाथि बुधबार सुनुवाइ हुन सकेन् । उनले अदालतको अवहेलना गरेको भन्दै अधिवक्ता त्रिलोकबहादुर चन्दले रिट दायर गरेका थिए । उक्त रिट सुनुवाइका लागि पेशीमा चढेको थियो । आज हेर्न नमिल्नेमा राखिएको छ । 

सर्वोच्चका न्यायाधीशहरू नृपध्वज निरौला र नित्यानन्द पाण्डेको सुनुवाइका क्रममा ढुंगानाले न्यायाधीश प्रधान र शारंगा सुवेदीको संयुक्त इजलासले गण्डकी प्रदेश सरकारका विषयमा गरेको फैसलालाई उदाहरण बनाएर भनाइ राखेका थिए । न्यायाधीश प्रधान र सुवेदीको इजलासले गण्डकीका मुख्यमन्त्री खगराज अधिकारीसँग बहुमत नभएको भन्दै परेको रिटमा ६० सदस्यीय गण्डकी प्रदेशसभामा सभामुख अलग गर्दा ३० नै बहुमत हुने फैसला गरेको थियो । 

ढुंगानाको अभिव्यक्तिले अदालतको अवहेलना भएको भन्दै चन्दले मंसिर ४ मा रिट दायर गरेका थिए । यसअघिका तीन पेसीमा पनि रिट हेर्न नमिल्नेमा परेको थियो । मंसिर ६ र ११ मा न्यायाधीश शारंगा सुवेदी र मंसिर १७ गते नित्यानन्द पाण्डेयको इजलासमा परेको उक्त रिट हेर्न नमिल्नेमा राखिएको थियो । कात्तिक २३ गते बसेको संसदीय सुनुवाइ समितिको बैठकमा ढुंगानाले न्यायाधीश सपना मल्ल प्रधानका विषयमा गरेको टिप्पणी अवहेलना भएको रिटमा दावी गरिएको छ ।  

यस विषयमा ढुंगानाले न्यायाधीश प्रधानमाथि प्रश्न उठाएका थिए । त्यही प्रश्नका कारण ढुंगानाविरुद्ध अधिवक्ता चन्दले सर्वोच्च अदालतमा अवहेलना मुद्दा दायर गरेका थिए । ०७३ साउन १३ मा भएको सुनुवाइमा पनि ढुंगानाले न्यायाधीश सिmारिस भएकी प्रधानलाई लोगो लगाएर झन्डामुनि उभिएको व्यक्तिले निष्पक्ष न्याय दिनेमा अविश्वास रहेको बताएका थिए । यो रिट चौथोपटक हेर्न नमिल्नेमा परेको हो ।  आज न्यायाधीश दोहोरिएर परेपछि हेर्न नमिल्नेमा राखिएको हो ।