सुनसरीमा सरकारी नम्बर प्लेट राखेको गाडीबाट एक व्यक्तिसहित ६९० किलो गाँजा बरामद गरियो

१९ मंसिर, सुनसरी । गाडीमा सरकारी नम्बर प्लेट राखेर गाँजा ओसारी रहेको अवस्थामा धरान उपमहानगरपालिका–१३ अमरहाटबाट प्रहरीले एक व्यक्तिसहित ६९० किलो गाँजा बरामद गरेको छ । प्रहरीले गाँजा बोकेका दुई वटा सरकारी गाडीसहित एक जनालाई पक्राउ गरेको हो ।

जिल्ला प्रहरी कार्यालय सुनसरीका अनुसार बा १झ ४६०५ नम्बरको स्कार्पियोबाट ३३० किलो र बा १ झ ५१२७ नम्बरको गाडीबाट ३६० किलो गाँजा बरामद गरेको हो । प्रहरीले बा १ झ ४६०५ नम्बरको स्कार्पियो चालक मोरङ सुन्दरहरैंचा नगरपालिका–११ का ३६ वर्षीय श्यामकुमार विकलाई नियन्त्रणमा लिएको छ ।

ती गाडीमा लागुऔषध गाँजाको ओसारपसार भइरहेको भन्ने सूचनाको आधारमा इलाका प्रहरी कार्यालय धरानबाट प्रहरी खटिएको थियो । प्रहरीले बा १झ ४६०५ नम्बरको स्कार्पियोबाट ११ वटा बोरामा रहेको ३३० किलोग्राम गाँजासहित चालक विकलाई पक्राउ गरेको थियो । गाडीलाई नियन्त्रणमा लिने क्रममा तत्काल भागेको बा १झ ५१२७ नम्बरको गाडी सोही ठाउँस्थित भित्री बाटोमा नियन्त्रणमा लिएको थियो ।

ती गाडीका चालक चालक फरार भएका थिए । उक्त गाडीलाई तलासी गर्दा १२ वटा प्लाष्टिकभित्र प्याक गरेको अवस्थामा ३६० किलोग्राम गाँजा फेला पारी बरामद गरेको थियो । प्रहरीले हाल फरार चालकको खोजी गर्नुका साथै यस सम्बन्धमा आवश्यक अनुसन्धान गरिरहेको छ । नेपालमा गाँजा प्रतिबन्धित लागुऔषधका रूपमा चिनिन्छ । यी सवारीसाधन सरकारी भने होइनन् । सरकारी गाडीको नम्बर प्लेट टाँसेर निजी गाडीमा गाँजा ओसारेको पाइएको सुनसरीका प्रहरी उपरीक्षक सुमन तिम्सिनाले बताए ।