बयानका लागि पर्सा नलगी रवि लामिछानेलाई राती नै चितवनबाट पोखरा पुर्याइयो

२० मंसिर, पोखरा । चितवनमा बयान सकेर राष्ट्रिय स्वतन्त्र पार्टीका सभापति रवि लामिछानेलाई गएराति नै पोखरा ल्याइएको छ । काठमाडौंमा बयान सकिए लगत्तै साहारा चितवन सहकारीको रकम हिनामिना सम्बन्धमा बयान लिन रविलाई चितवन लगिएको थियो । 

मंगलबार बिहान चितवन पुर्याइएका उनको बुधबार बयान सकिएको थियो । उनलाई गएराति ११ बजे नै चितवनबाट पोखरा लगिएको राष्ट्रिय स्वतन्त्र पार्टीका नेता दीपक बोहोराले जानकारी दिएका छन् । उनका अनुसार, रविलाई बिहान ३ बजे पोखरा पुर्याइएको थियो ।

जिल्ला प्रहरी कार्यालय कास्कीका प्रवक्ता डीएसपी वसन्तकुमार शर्माले उनलाई राति ३ बजेतिर कास्की पुर्याइएको र अहिले हिरासतमा रहेको पुष्टि गरेका छन् । रवि लामिछानेलाई पोखरा पुर्याउँदा बिहान भइसकेको थियो । अहिले जिल्ला प्रहरी कार्यालयमा राखिएको छ । 

पर्सा प्रहरीले पनि पक्राउ पुर्जी जारी गरेको छ । रविलाई पर्सा नलगि पोखरा ल्याइएको हो । यसअघि बुधबार प्रहरीले रास्वपाका नेताहरूलाई बिहीबार ११ बजेको उडानबाट पोखरा लगिने बताएर राती नै ल्याएको हो । बुधबार रविका समर्थकले चितवनमा प्रदर्शन गर्दा प्रहरीसहित केही प्रदर्शनकारीहरू घाइते भएका थिए ।