एनपीएलमा सट्टेबाजी खेलाउने थप ३ जना सीआईबीको नियन्त्रणमा

२० मंसिर, काठमाडौं । नेपाल प्रहरीको केन्द्रीय अनुसन्धान ब्यूरो (सीआईबी) को टोलीले नेपाल प्रिमियर लिग (एनपीएल)मा सट्टेबाजी खेलाएको आरोपमा थप तीन जनालाई पक्राउ गरेको छ । कीर्तीपुर मैदानबाट केन्द्रीय टोलीले तीन जनालाई नियन्त्रणमा लिएको जानकारी दिएको छ । यसअघि चार जना भारतीय नागरिकलाई सट्टेबाजी खेलाएको आरोपमा पक्राउ गरिएको थियो ।

उनीहरुले स्पोर्ट बाजी, प्रोबो ललगायत अनलाइन बेटिङ एपबाट सट्टेबाजी खेलाएको आरोप छ । पक्राउ परेकाहरुविरुद्ध सट्टेबाजी खेलाउन नहुने कसुरमा अनुसन्धान अघि बढाइएको छ । ब्यूरोका प्रवक्ता होविन्द्र बोगटीका अनुसार यसअघि भारत कलकत्ता घर भएका २४ वर्षीय सुमन घोष, उत्तर प्रदेश कानपुर घर भएका अमित यादव, बिहार घर भएका २७ वर्षीय सुमन्त कुमार र बिहारकै ३० वर्षीय ब्रजेश कुमार यसअघि पक्राउ गरिएको थियो । 

ती आरोपीहरूले दुईवटा एपको प्रयोग गरेर सट्टेबाजी गराएको प्रहरीको प्रारम्भिक अनुसन्धान निष्कर्ष छ । स्पोर्टस् बाजी र प्रोबो एप मार्फत उनीहरूले सट्टेबाजी गराउने गरेको एसपी बोगटीले जानकारी दिए । अन्य समूह पनि यस अभियानमा रहेको र उनीहरुको पनि खोजी भइरहेको प्रहरीले जनाएको छ ।