गृह मन्त्रालयले महिला प्रतिनिधित्व सुनिश्चित गर्ने गरी निर्वाचन विधयेक संसदमा लान्छः गृहमन्त्री

२० मंसिर, काठमाडौं । गृहमन्त्री रमेश लेखकले संविधानको भावना अनुरूप समानुपातिक प्रतिनिधित्वलाई सुनिश्चित गर्न बन्दै गरेको एकीकृत निर्वाचन विधेयक आगामी संघीय संसदमा पेस गर्ने तयारी रहेको बताएका छन् । उनले गृह मन्त्रालयले पेश गर्ने विधेयकमा महिलाका धेरै अधिकार सुनिश्चित हुने आश्वासन दिएका छन् । महिलामाथि हुने जुनसुकै प्रकृतिका हिंसाप्रति सरकार सचेत रहेको उनको भनाइ छ । 

बिहीबार सिंहदरबारस्थित गृहमन्त्रालयमा ३३ औं अन्तर्राष्ट्रिय लैंगिक हिंसा विरुद्धको १६ दिने अभियानका क्रममा २६ नागरिक संस्थाले बुझाएको ध्यानाकर्षण पत्र बुझ्दै महिला विरुद्ध हुने सबै प्रकारका हिंसा अन्त्य गर्न प्रतिबद्ध उनले जनाएका हुन् । वैदेशिक रोजगारीमा महिला सुरक्षाको विषयमा पनि आफू गम्भीर रहेको उनले बताए । आप्रवासी महिला कामदारलाई शोषण र दुव्र्यवहारबाट जोगाउन सरकारका संयन्त्रहरू क्रियाशील बनाएको उनको दावी थियो । 

पछिल्लो समय सामाजिक सञ्जाल, डिजिटल मिडियाबाट पनि महिलाहरू प्रताडित भएको भन्दै गृहमन्त्री लेखकले लोकतन्त्रमा आलोचना, विरोध र धारणा राख्न पाइन्छ तर सभ्य र सुसंस्कृत ढंगबाट गर्नुपर्ने बताए । उनले डिजिटल मिडियामा आइरहेको घृणात्मक अभिव्यक्ति र हिंसा, दुर्व्यवहार नियन्त्रणका लागि पहल भइरहेको बताए ।