२०८४ को निर्वाचन देउवाको नेतृत्वमा हुन्छः प्रधानमन्त्री

२० मंसिर, काठमाडौं । प्रधानमन्त्री केपी शर्मा ओलीले सत्ता समीकरणमा कुनै समस्या नआउने भन्दै आफूले १८ महिना पुरा गरेको भोलिपल्ट नेपाली कांग्रेसका सभापति शेरबहादुर देउवा प्रधानमन्त्री बन्ने बताएका छन् । आफूले १८ महिना सरकार चलाएपछि कांग्रेस सभापति देउवालाई सत्ता हस्तान्तरण गर्ने र देउवाले नै ०८४ को चुनाव पनि गराउने ओलीले बताए  । 

आज चीन भ्रमणबाट फर्किएका ओलीलाई त्रिभुवन अन्तर्राष्ट्रिय विमानस्थलमा पत्रकारहरुले प्रधानमन्त्रीको कार्यकाल कति लम्बियो भनेर सोधेका थिए । सो प्रश्नको जवाफ दिने क्रममा ओलीले १८ महिना आफूले सरकार चलाउने बताउँदै भने, ‘त्यसपछि शेरबहादुर देउवाजीलाई मैले हस्तान्तरण गर्छु । उहाँले डेढ वर्ष चलाउनुहुन्छ, चुनाव गराउनुहुन्छ ।’

उनले आफूहरुबीच चुनावसम्मको मात्र सहमति भएको बताए । चुनावमा बहुमत ल्याउन कोसिस गर्ने र बहुमत नआए सरकार गठनका अरु विकल्पमा जाने ओलीको भनाइ छ । चुनावमा हामी हरेकले बहुमत ल्याउने कोशिश गरौंला । बहुमत आउँछ भन्ने हामीलाई विश्वास छ, उनले भने ।