एनएमबी बैंकलाई एसिया प्यासिफिक लैङ्गीक समावेशी अवार्ड प्राप्त

२० मंसिर, काठमाडौं । एनएमबी बैंकलाई २०२४ को यूएन वमन -UN Women)  अवार्ड प्राप्त भएको छ । एशिया–प्यासिफिक लैङ्गिक समानता र सामाजिक समावेशीकरण प्रवर्द्धन अवार्ड अन्तर्गत लैङ्गिक समावेशी कार्यस्थल कायम गर्ने पहललाई सम्मान गर्दै विशेष अवार्ड प्रदान गरेको हो । यो सम्मान लैङ्गिक समानता र सामाजिक समावेशीकरण प्रवर्द्धन गर्ने एनएमबी बैंकको पहलहरूको सम्मान स्वरूप अवार्ड प्राप्त भएको बैंकले जनाएको छ ।

UN Women / UN Global Compact द्वारा कार्यस्थल, बजार र समुदायहरूमा महिला सशक्तीकरण गर्दै लैङ्गिक समानता प्रवर्द्धनका लागि विश्वव्यापी मापदण्डहरू निर्धारण गरेको छ । एनएमबी बैंकले ती विश्वव्यापी मापदण्डहरू कार्यान्वयन गर्नका लागि बैंकको तर्फबाट सक्दो प्रयास गरेको जनाएको छ ।

ती प्रयासहरूमा She Leads Tomorrow Scholarship, NMB NextGen Banking Leaders Scholarship, महिलाको नेतृत्वमा सबै महिला कर्मचारीद्वारा सञ्चालित शाखाहरू, महिला नेतृत्व विकासका कार्यक्रमहरू र सामाजिक समावेशीकरणमा केन्द्रित संस्थागत सामाजिक उत्तरदायित्व (CSR) गतिविधिहरू रहेका छन् ।

यस अवार्डले एनएमबी बैंकलाई विश्व बजारमा WEPs अन्तर्गतको UN Women द्वारा मान्यता प्राप्त पहिलो नेपाली संस्थाको रूपमा उभ्याएको छ । एसिया–प्यासिफिक देशका ६०० भन्दा बढी आवेदक संस्थाहरू मध्यबाट यो विशेष अवार्ड बैंकलाई प्रदान गरेको हो । 

यस अवार्डले एनएमबी बैंकलाई निरन्तर रुपमा समावेशी र दिगो विकास गर्ने आफ्नो उद्देश्य प्राप्त गर्दै अघि बढ्न प्रोत्साहन मिलेको छ । एनएमबी बैंकले हाल देशभर २०१ शाखाहरु, १८७ एटीएमहरु र ११ एक्सटेन्सन काउन्टरहरुमार्फत उच्चस्तरीय सेवा प्रदान गर्दै आइरहेको छ ।