नेपाल प्रेस युनियनको निर्णयप्रति धर्मेन्द्र झाको असन्तुष्टि, सल्लाहकारबाट दिए राजीनामा

२३ मंसिर, काठमाडौं । नेपाल पत्रकार महासंघको आसन्न निर्वाचनमा नेपाल प्रेस युनियनका अध्यक्ष एवं पदाधिकारीहरूको  भूमिका र उम्मेदवार छनोट प्रक्रियालाई लिएर विभिन्न तहमा चरम असन्तुष्टि देखिएको छ ।

युनियन नेतृत्वकाे भूमिकाप्रति युनियन कै सल्लाहकार एवं नेपाल पत्रकार महासंघका पूर्व अध्यक्ष धर्मेन्द्र झाले चर्को असन्तुष्टि राखेका छन् । उनले प्रेस युनियनको सल्लाहकार पदबाट राजीनामा समेत दिएका छन् ।

पत्रकार महासंघको निर्वाचनको विषयमा युनियनका सल्लाहकारसमेत रहेका झालाई कुनै जानकारी नदिएको र निर्वाचनबारे कुनै सल्लाह नै नगरिएको भन्दै उनले सल्लाह आवश्यक नपर्ने संस्थाको सल्लाहकार भएर बस्न नसकिने बताएका छन् । झाले सामाजिक सञ्जालमा लेख्दै आफूसँग निर्वाचनको विषयमा कुनै सल्लाह नगरिएको गुनासाे गरेका छन् । 

युनियनका सल्लाहकारसमेत रहेका झाले सल्लाह नलिने, सल्लाह नमान्ने र सल्लाह नै आवश्यक नपर्ने ठाउँमा सल्लाहकार भन्दै बसिरहनुको तुक नभएको बताएका छन् । उनले सल्लाहकार पद त्यागेको घोषणा पनि गरेका छन् ।

पूर्व अध्यक्ष झाले सामाजिक सञ्जालमा यस्तो लेखेका छन्, ‘मेरा आत्मीयजनलाई जानकारी–सल्लाह नलिने, सल्लाह नमाग्ने र सल्लाह आवश्यक नै नपर्ने ठाउँमा सल्लाहकार भन्दै बसिरहनुको के तुक भयो र ? छोडियो । साथीहरूसँग रहिरहन त पदै किन चाहियो  ? म सधैं मेरा साथीहरूसँगै छु र रहिरहनेछु ।  मेरो  कसै प्रति  कुनै गुनासो छैन । जे छ, आफैंसँग छ ।’ 

यद्यपि युनियनले तय गरिसकेका उम्मेदवारहरूलाई विजयी गराउनु आफूहरूको कर्तव्य भएको झाले बताए । उनले युनियनका सबै सदस्यहरूलाई चौतारी युनियन गठबन्धनलाई जिताउन आव्हान पनि गरेका छन् ।

यसैबीच पत्रकार महासंघको निर्वाचनमा प्रेस युनियनले अध्यक्षसहितको महत्वपूर्ण पदहरू एमाले निकट प्रेस चौतारीलाई बुझाएको युनियनका सदस्यहरूले आरोप लगायका छन् । आफूले पाएको पदहरुमा समेत व्यापक असन्तुष्टि देखिएको, योग्य र संस्थाप्रति योगदान पुर्याउनेलाई उम्मेदवार नबनाएर संस्थाको भविष्य जोखिममा परेको जस्ता आरोप युनियन नेतृत्वप्रति सदस्यहरूले लगाएका छन् । प्रेस युनियन नेतृत्वले गरेका निर्णय संस्था र सिंगो पत्रकार जगतका लागि घातक भएको युनियनका अधिकांश सदस्यहरूको ठम्याई छ । महासंघका लागि उम्मेदवार छनोटमा युनियनको नेतृत्व नालायक भएको आरोप धेरैतर्फबाट लाग्न थालेको छ । 

नेपाल पत्रकार महासंघमा गरिएको कांग्रेस–एमालेको गठबन्धन र उम्मेदवार छनोटको विषयलाई लिएर देशैभरि असन्तुष्टि बढेको छ । असन्तुष्टि प्रकट पत्रकार महासंघको केन्द्रीय पदाधिकारीबाटै सुरू भएको छ । मंसिर २८ गते हुने नेपाल पत्रकार महासंघको निर्वाचनका लागि अध्यक्षमा युनियनले चौतारीसँग सहकार्य गर्दा कांग्रेस निकट प्रेस युनियनका रमेश विष्टले छुट्टै प्यानल बनाएका छन् । एमालेनिकट प्रेस चौतारीबाट निर्मला शर्मालाई गठबन्धनले अध्यक्षमा अगाडि सारेपछि युनियनभित्रै गठबन्धनमा विद्रोह हुने देखिएको छ ।