गढीमाई मेलास्थलबाट दुई थान पेस्तोलसहित एक युवक प्रहरीको नियन्त्रणमा

२४ मंसिर, सर्लाही : गढीमाई मेला स्थलबाट दुई थान पेस्तोलसहित एक युवकलाई प्रहरीले नियन्त्रणमा लिएको छ। प्रहरीका अनुसार आइतबार साँझ बराल नगरपालिका–६, मिर्जापुर निवासी इन्दल सहनीका अन्दाजी १८ वर्षीय छोरा गोलु भनिने अमर जितकुमार सहनीलाई दुई थान पेस्तोलसहित नियन्त्रणमा लिइएको बताइएको छ ।

गढीमाई मेलास्थलमा हतियार देखाउँदै झै–झगडा गरिरहेको अवस्थामा इलाका प्रहरी कार्यालय बलराबाट खटिएको प्रहरी वरिष्ठ नायब निरीक्षक दीपेन्द्र मल्लको टोलीले सहनीलाई नियन्त्रणमा लिइएको हो । 

प्रहरीले सहनीका साथबाट एक थान चाइनिज पेस्तोल र एक थान नलकटुवा पेस्तोल बरामद गरेको जनाएको छ । बरामद पेस्तोलसहित युवकलाई थप अनुसन्धानका लागि जिल्ला प्रहरी कार्यालय मलङ्गवा झिकाइएको जिल्ला प्रहरी कार्यालयका प्रहरी नायब उपरीक्षक दीपक श्रेष्ठले जानकारी दिए । जिल्लामा बरहथवा, हरिपुर, कबिलासी, रामनगर र बलरा गरेर करिब आधा दर्जन स्थानमा गढीमाई मेला लागिरहेको छ ।