सरकारले भन्योः रविमाथि न्यायपूर्ण ढंगले अनुसन्धान भइरहेको छ, अभद्र व्यवहार त रास्वपाले देखायो

२५ मंसिर, सुर्खेत । सरकारले सहकारी ठगी प्रकरणको अनुसन्धानमा रहेका राष्ट्रिय स्वतन्त्र पार्टीका सभापति एवं पूर्व गृहमन्त्री रवि लामिछानेमाथि कुनै प्रकारले अभद्र व्यवहार नभएको प्रष्ट पारेको छ । प्रहरीले अनुसन्धान गर्ने क्रममा उनीमाथि मानवअधिकार हनन हुने खालका कुनै पनि गतिविधि नगरिएको दावी गरेको छ । रविमाथि मर्यादापूर्ण रुपले अनुसन्धान भइरहेको सरकारको दावी छ ।

मंगलबार गृहमन्त्री रमेश लेखकले रवि लामिछानेमाथि न्यायपूर्ण ढंगले अनुसन्धान भइरहेको भन्दै उनीमाथि कुनै प्रकारका गलत व्यवहार नभएको र मानवअधिकार हनन हुने खालका कुनै पनि काम सरकारी पक्षबाट नभएको बताएका छन् । सुर्खेतमा सञ्चारकर्मीहरूसँग कुरा गर्दै मन्त्री लेखकले लामिछानेमाथि प्रहरीबाट अभद्र व्यवहार भएको भन्ने हल्ला गलत भएको दावी गरे । सडकमा हुल बाँधेर कसैलाई न्याय नमिल्ने भन्दै उनले अनुसन्धानमा प्रभाव पर्ने काम नगर्न रास्वपा कार्यकर्तालाई चेतावनी दिए । 

उनले सहकारीको रकम अपचलन भएको विषयमा लामिछानेमाथिको अनुसन्धानलाई प्रभावित बनाउने काम भइरहेको बताए । सहकारी रकमका विषयमा रवि लामिछानेमाथि मात्र अनुसन्धान भएको होइन, अरु पनि यसमा तानिएका छन्, उनले भने, ‘अनुसन्धान हुँदै गर्दा अदालत घेर्ने काम भएको छ, यस्ता विधिको शासन उल्लंघन गर्ने काममा प्रमुख प्रतिपक्षी दलले नै सहयोग गरेको छ ।’