मन्त्री पौडेलले रुद्र मरासिनीलाई ट्रमा सेन्टरबाट हटाएर बद्री रिजाललाई दिए सुपरिटेन्डेन्टको जिम्मेवारी

२५ मंसिर, काठमाडौं ।  स्वास्थ्यमन्त्री प्रदीप पौडेलले मन्त्रालय मातहतका उच्च अधिकारीको सरुवा गरेका छन् । केही उच्च कर्मचारीको जिम्मेवारी हेरफेर गरिएको उनको सचिवालयले जनाएको छ । जसअनुसार ट्रमा सेन्टरको प्रमुख मेडिकल सुपरिटेन्डेन्टमा हाडर्जोनी विशेषज्ञ डा. बद्री रिजाललाई लगिएको छ । 

हाल सेन्टरको नेतृत्वमा रहेका डा. रुद्र मरासिनीलाई हटाइएको छ । डा. मरासिनीले भने अब सेन्टरमा विशेषज्ञ चिकित्सकका रुपमा रहनेछन् । यसअघि पनि डा. रिजालले ट्रमामा उक्त जिम्मेवारी सम्हालिसकेका छन् । टेकु अस्पतालकी रोशनी तुईतुईलाई वीर अस्पताल नर्सिङ क्याम्पस प्रमुख बनाइएको छ । 

वीर अस्पतालको नर्सिङ क्याम्पसकी बदना थापाको टेकु अस्पताल सरुवा गरिएको छ । व्यवस्थापन महाशाखाका डा. सुरेन्द्र चौरसियालाई उपचारात्मक महाशाखा पठाइएको छ । व्यवस्थापन महाशाखाको जिम्मेवारी दयाकृष्ण पन्तले पाएका छन् । 

यसैगरी मन्त्री पौडेलले ५ जना विज्ञ सल्लाहकार समिति पनि गठन गरेका छन् । मन्त्रीस्तरीय निर्णय गर्दै उनले विज्ञ सल्लाहकार समिति गठन गरेका हुन् । समितिमा मेडिकल काउन्सिलका पूर्वअध्यक्ष डा. भगवान कोइराला, पूर्वस्वास्थ्य सचिव डा. सुधा शर्मा, गण्डकी प्रदेश सरकारको योजना आयोगका पूर्वउपाध्यक्ष रघु काफ्ले छन् । 

यस्तै पूर्वस्वास्थ्यमन्त्री गगन थापाका सल्लाहकार प्रताप पौडेल र अमित भण्डारी पनि समितिमा राखिएका छन् । मन्त्री पौडेलले मन्त्रालयका नीति नियम प्रभावकारी बनाउन समिति बनाएको उनको सचिवायले जनाएको छ । ५ जनाको विज्ञताले मन्त्रालयको कामलाई अझै प्रभावकारी बनाउने उनको भनाइ छ ।