कर्णालीसँग ७ विकेटले पराजित भयो पोखरा एभेन्जर्स

२५ मंसिर, काठमाडौं । नेपाल प्रिमियर लिग (एनपिएल) मा कर्णाली याक्सले पोखरा एभेन्जर्समाथि ७ विकेटको सहज जित निकालेको छ । पाँच खेलमा कर्णालीको यो तेस्रो जित हो । पोखरा चार मध्ये तीन खेलमा पराजित भइसकेको छ । मंगलबारको दोस्रो खेलमा पोखरा कर्णाली याक्ससँग ७ विकेटले पराजित भएको हो । 

एनपीएलको चार खेलमा पोखराले ३ खेलमा हार र १ खेलमा मात्र जित निकाल्दै २ अंकमा छ । पराजित पोखरा २ अंकमा छैटौँ स्थानमा छ । पोखराले दिएको १०४ रनको लक्ष्य कर्णालीले १५ ओभरमा ३ विकेटको क्षतिमा पूरा गर्याे । कर्णालीको जितमा गुल्सन झाले नटआउट ४९ रन जोडे । उनले ३७ बलमा ३ चौका र ४ छक्का प्रहार गरे ।

त्यसअघि कर्णालीका ओपनर भने चल्न सकेनन् । देव खनाल शून्य र बाबर हायत ७ रनमा आउट भए । पोखरालाई पराजित गर्दै कर्णालीले भने एनपीएलमा तेस्रो जित निकाल्दै अंकतालिकामा ६ अंक जोडेको छ । जितसँगै कर्णालीको प्लेअफ पुग्ने सम्भावना बलियो बनेको छ । 

कर्णालीका लागि गुल्सन झा ४९ र विलियम बसिस्टो २ रनमा अविजित रहे ।  चाडविक वाल्टनले ४२ रन बनाउँदै पेभेलियन फर्के । उनले ३४ बलमा ६ चौका र १ छक्का प्रहार गर्दा कुशल भुर्तेलको बलमा बोल्ड आउट भए । ओपनर बाबर हायात ७ रन बनाउँदा सागर ढकालको बलमा बोल्ड भए । ३ बलको सामान गरेका देव खनाल शुन्य रनमा नै विपिन खत्रीको बलमा एलबीडब्लु धरापमा गरे । 

कीर्तिपुरस्थित त्रिवि क्रिकेट मैदानमा टस जितेर ब्याटिङ गरेको पोखरा १६.३ ओभरमा १ सय ३ रनमा समेटियो । कर्णाली याक्सका विलियन बसिस्टोले ६ विकेट लिएसँगै पोखराको ब्याटिङ लाइन धरापमा परेको थियो । 

अस्ट्रेलियन अलराउन्डर बोसिस्टोले ६ विकेट लिने क्रममा ४ ओभरमा २८ रन खर्चेका थिए । जारी एनपीएलमा यो सबैभन्दा उत्कृष्ट बलिङ हो । यसअघि चितवन राइनोजका सोहेल तनवीर, सुदूरपश्चिम रोयल्सका नरेन साउद र जनकपुर बोल्ट्सका हर्ष ठाकरले एकै खेलमा ५–५ विकेट लिएका थिए ।

आकाश चन्द १ रन बनाई सोमपाल कामीको बलमा एलबीडब्लू आउट भए भने विपिन खत्री १० रनमा रनआउट भए । शिखर धवनबिना कर्णाली एनपीएलमा यो पहिलो खेल थियो । धवनको स्थानमा खेलेका बाबरले फेरि कुनै प्रभाव पार्न सकेनन् ।