१७ वर्षकी बालिका बलात्कार आरोपमा पक्राउ परेका पूर्वमेयरलाई चार दिन हिरासतमा राखिने

२५ मंसिर, झापा । विर्तामोड नगरपालिकाका पूर्वमेयर ध्रुवकुमार शिवाकोटीलाई चार दिन हिरासतमा राखेर अनुसन्धान गर्न जिल्ला अदालत झापाले अनुमति दिएको छ । बालिका बलात्कारको आरोपमा उनलाई सोमबार पक्राउ गरिएको थियो । जिल्ला प्रहरी कार्यालय झापाका प्रहरी प्रवक्ता डीएसपी कृष्णकुमार चन्दले अदालतबाट चार दिनको म्याद थप अनुमति लिइएको जानकारी दिएका छन् । 

आफ्नै घरमा काम गर्न राखेकी १७ वर्षकी बालिकालाई जबरजस्ती करणी गरेको आरोपमा उनी पक्राउ परेका हुन् । पीडित बालिकालाई कलेजबाटै भारततर्फ जाँदै गर्दा सोमबार बिहान मात्रै काँकडभिट्टाबाट उद्धार गरेर प्रहरीलाई बुझाइएको थियो । बालिकाले आफूलाई शिवाकोटीले बलात्कार गरेको भन्दै घर फर्किन नमानेपछि प्रहरीले जाहेरी लिएर अनुसन्धान अगाडि बढाएको थियो । 

शिवाकोटी २०७४ को स्थानीय तहको निर्वाचनमा नेकपा एमालेबाट बिर्तामोड नगरपालिकाको मेयरमा निर्वाचित भएका थिए ।  उनले ती बालिकालार्य पढाइदिने शर्तमा घरको काम गर्न राखेका थिए । बालिकाका बुबा नभएको र आमा भारतमा रहेको प्रहरीले जानकारी दिएको छ ।