पर्साको सानोपाइला सहकारी ठगीसम्बन्धी बयान सकेर रविलाई काठमाडौं हुँदै पोखरा फर्काइयो

२६ मंसिर, वीरगञ्ज । सानो पाइला सहकारीको रकम अपचलनसम्बन्धी बयान सकेर राष्ट्रिय स्वतन्त्र पार्टी (रास्वपा) का सभापति एवं पूर्वगृहमन्त्री रवि लामिछानेलाई पोखरा फर्काइएको छ । उनलाई सिमराबाट काठमाडौं र काठमाडौंबाट पोखरा लगिने प्रहरीले जनाएको छ ।  

पर्सा जिल्ला सरकारी वकिल कार्यालयले सहकारी ठगीको अभियोगमा हिरासतमा लिएर अनुसन्धान भइरहेका लामिछानेलाई पोखरातर्फ पठाएको हो । पर्साको सानो पाइला सहकारी संस्था ठगी प्रकरणमा लामिछानेसहित १४ जनाविरूद्ध पक्राउ पुर्जी जारी भएको थियो । जिल्ला अदालत पर्साले लामिछानेसहित छविलाल जोशी, जिबी राई, रामबहादुर खनालसहितका व्यक्तिविरूद्ध पक्राउ पुर्जी जारी गरेको थियो । 

निजसँगको बयान पूरा भएपछि उक्त कार्यालयले विमानबाट कास्की पठाउने क्रममा उनलाई सिमरा विमानस्थल पठाइएको हो । जिल्ला सरकारी वकिल कार्यालयका प्रमुख भोलानाथ निरौलासहितको टोलीले निजसँग बयान लिएको थियो । पर्सा जिल्ला प्रहरी कार्यालयका प्रमुख किशोर लम्सालले अभियुक्त लामिछानेलाई सिमराबाट काठमाडौँ हुँदै कास्की पुर्याइने जानकारी दिए ।